Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 149 Hüküm no: 170 Orijinal metin no: [27a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Arslan Beşe’nin alacağının vefât etmiş olan Ömer Beşe’nin terekesinden ödenmesi Vilâyet-i Anadolu’da Bendereğli kazâsına tâbi‘ İmranlar nâm karye ahâlîsinden işbu sâhibü’l-kitâb el-Hâc Arslan Beşe b. Ahmed mahfil-i şer‘-i şerîfde karye-i mezbûre ahâlîsinden olup bundan akdem müteveffâ olan Ömer Beşe b. Yusuf’un sulbiye sagīre kızı ve hasran vârisi olan Âişe’nin tesviye-i umûri’çün vasiyy-i şer‘îsi Mehmed Bey b. Abdullah nâm kimesne mahzarında üzerine da‘vâ edip âriyeten reisim olan Turak zimmîde yetmiş yedi bin akçe ve Osman Reis’de elli sekiz bin akçe cem‘an yüz on beş bin akçe hakkımı ahz ve îsâle müteveffâ-i mezbûr Ömer Bey’i vekîl ve nâib-i menâb nasb ve ü ta‘yîn edip ol dahi ba‘de’l-kabûl meblağ-ı mezbûr yüz on beş bin akçeyi mezbûrân reislerinden ahz u kabz edip şuhûd mahzarında ikrâr u i‘tirâf etmiş iken kable’l-istîfâ müteveffâ olmağile tereke-i vâfiyesinden taleb ederim dedikde, gıbbe’s-suâl vasiyy-i mezbûr husûs-ı mezbûru bi’l-külliye inkâr ettikde müdde‘î-i mezbûrdan da‘vâsına muvâfıka beyyine taleb olundukda udûl ü sikātdan Mustafa Efendi b. Mehmed ve Receb Beşe b. Osman nâm kimesneler li-ecli’ş-şehâde hâzırân olup istintak olunduklarında fi’l-hakīka müteveffâ-i mezbûr Ömer Bey bizim huzûrumuzda sıhhati hâlinde müdde‘î-i mezbûra vech-i muharrer üzere yüz on beş bin akçe edâsı lâzım deynim vardır deyü ikrâr u i‘tirâf eyledi, bu husûsa şâhidleriz, şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de ri‘âyeti şerâyiti’l-kabûl şehâdetleri hayyiz-i kabûlde vusûl bulup müdde‘î-i mezbûra meblağ-ı merkūmdan küllen ve ba‘zan ahz u kabz eylemeyip zimmetini bir tarîkle ibrâ eylemediğine yemîn teklîf olunup hasebi’l-mesûl yemîn bi’llâhi te‘âlâ eyledikden sonra mûcebince müteveffâ-i mezbûrun tereke-i vâfiyesinden meblağ-ı mezbûru edâ ve îfâya vasiyy-i mezbûra tenbîh-birle mâ-vaka‘a ketb olundu. Fi’l-hâmis ve’l-ışrîn min-Zilhicceti’ş-şerîfe li-sene selâse ve sittin ve elf. Şuhûdü’l-hâl: Muslihiddin Efendi [b.] Şa‘ban, Ramazan Beşe b. İbrahim, Mustafa Efendi b. Mehmed, Ramazan Beşe er-râcil, Hüseyin Beşe çukadâr, Ali Bey emîn-i mahkeme.