Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 150 Hüküm no: 171 Orijinal metin no: [27a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmî bt. Ali’nin Balkapanı’nda bulunan odasını Selim Çelebi’ye sattığı Mahmiye-i İstanbul’da Firuz Ağa Mahallesi’nde sâkine Ümmî bt. Ali tarafından husûs-ı âtîye vekîl olup mezbûreyi ma‘rifet-i şer‘iyye ile ârifân olan Halil Efendi b. Ali el-imâm ve Mustafa Çelebi b. el-Hâc Mehmed şehâdetleriyle vekâleti sâbite olan zevci Seyyid Mehmed Çelebi b. Seyyid Osman mahfil-i şer‘-i şerîfde işbu sâhibü’l-kitâb Selim Çelebi b. Kasım el-Cezzâr muvâcehesinde bi’l-vekâle ikrâr u i‘tirâf edip mahmiye-i mezbûrede Ayasofya-i kebîr Evkāfı’ndan Balkapanı’nda fevkānî odalardan sol cânibinde vâki‘ bir tarafdan Veli Hacı Mustafa odabaşı tasarrufunda olan oda ve bir tarafdan Mustafa Bey el-bevvâbü’s-sultânî tasarrufunda vâki‘ olan oda ile mahdûd mezbûre Ümmî’ye tasarrufu babam müteveffâ-i mezbûr Ali’den intikāl eden bir bâb altıncı vâki‘ olan odanın hakk-ı tasarrufunu izn-i mütevellî-i vakf-ı mezbûr ile elli dört bin akçe bedel mukābelesinde ferağ ve tefvîz ol dahi tefevvüz ve kabûl edip bedel-i ferağ elli dört bin akçeyi müvekkile-i mezbûre tamamen ahz u istîfâ eyleyip zikrolunan odada min-ba‘d medhal ve alâkam kalmadı, hasbe-mâ yürîd mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb sebt ü ketb olundu. Fi’s-sânî mine’l-Muharremi’l-harâm min-şühûr sene erba‘a ve sittin ve elf. Şuhûdü’l-hâl: Mehmed Ağa Kedhüdâ-yı Murad Paşa, el-Hâc Hasan Beşe el-Hamâmî, Mehmed Çelebi b. el-Hâc İsa el-yesârî, el-Hâc Salim b. Cuma ve gayruhum mine’l-huzzâr.