Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 152 Hüküm no: 173 Orijinal metin no: [27b-1, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fahreddin b. Mustafa’nın evini istiğlâl yoluyla Mehmed Beşe b. Bâli’ye sattığı Mahmiye-i Galata hısnı ebvâbından Kulekapısı dâhilinde vâki‘ Okçu Musa Mahallesi’nde sâkin Fahreddin b. Mustafa eş-şehîr bi-İslâmzâde nâm kimse meclis-i şer‘-i şerîf ve mahfil-i dîn-i münîfe hâzır olup işbu akdin kendisinden sudûruna kadar mâliki olduğu ve taht-ı tasarrufunda bulundurduğu, mahalle-i mezbûrede kâin, bir tarafından müezzin Mehmed Çelebi mülkü, bir tarafından Ali Çelebi Vakfı, iki tarafından da tarîk-i âm ile mahdûd bulunan cemî‘ menzilini cümle tevâbi‘i ve levâhıkı ile râyicü’l-vakt üç yüz seksen riyâlî guruş semen-i mu‘ayyen-i makbûzla Mehmed Beşe b. Bâli’ye bey‘ eylediğini ikrâr u i‘tirâf etti. Mezbûr Mehmed Beşe de kendi malıyla ve istiğlâl maksadıyla menzil-i mezkûru iştirâ etti. Mukırr-ı mezbûrun ikrârını mukarrun lehü’l-mezbûr bi’l-muvâcehe tasdîk etti. Bâyi‘-i mezkûrun istîcârı üzere müşteri-yi merkūm ba‘de’t-tahliyye ve’t-tekābuz zeyl-i kitâbda mezkûr târîhden doksan gün tamamına menzil-i mezbûru râyicü’l-vakt yirmi riyâlî guruş ücret-i kirâ ile icâreye verdi. Cerâ zâlike ve hurrire fi’l-yevmi’s-sâlis mine’l-Muharremi’l-harâm li-sene erba‘a ve sittin ve elf. Şuhûdü’l-hâl: Mustafa Çavuş-ı Tersâne-i âmire, Musa b. İsa, Mustafa Çelebi b. Mehmed, Üstâd Mehmed câme-şûy, Hüseyin Beşe odabaşı, Emir Hasan Çelebi, İbrahim Çelebi b. Davud, Derviş b. Ali, Mehmed b. Hüseyin ve gayruhum mine’l-huzzâr