Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 153 Hüküm no: 176 Orijinal metin no: [27b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Beşe’nin cariyesini azat ettiği Mahmiye-i İstanbul’da Samanveren Mahallesi’nde sâkin Mahmud Beşe b. Ömer nâm kimesne meclis-i şer‘-i hatîr-i lâzımü’t-tevkīrde kendüye rıkkını mu‘terife olan orta boylu, açık kaşlı, zenciyyetü’l-asl Fâtıma bt. Abdullah nâm câriye-i memlûkesi muvâcehesinde ikrâr-ı tâm ve takrîr-i kelâm edip memlûkem mevsûfe-i mezbûreyi hasbeten lillâhi te‘âlâ ve taleben li-merzâtihî “Yevme yestazıllü’l-mer’u tahte zılli sadakātihî ve rağbetihî bi-mâ-kāle’n-nebiyyü’l-muhtâr: Men a‘taka rakabeten mümineten a‘taka’llâhu te‘âlâ bi-külli udvin minhâ udven minhu mine’n-nâr” âzâd ve i‘tâk ve kayd-ı rıkdan ıtlâk eyledim, ba‘de’l-yevm mevsûfe Fâtıma sâir harâir-i asliyyât gibi hürre olup üzerinde hakk-ı velâdan gayrı hakkım kalmamışdır dedikde mâ-vaka‘a bi’t-taleb ketb ü sebt olundu. Fi’l-yevmi’t-tâsi‘ mine’l-Muharremi’l-harâm li-sene erba‘a ve sittin ve elf. Şuhûdü’l-hâl: Ahmed Beşe b. Mehmed, Hasan Beşe b. İsmail, Mehmed Çelebi b. Ahmed, Mustafa b. Mehmed, İbrahim Çelebi b. Davud ve gayruhum mine’l-huzzâr.