Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 154 Hüküm no: 177 Orijinal metin no: [27b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasım Ağa’nın bağ, bahçe ve bostanını sattığı Mahrûse-i Üsküdar -sînet ani’l-ekdâr- kazâsı muzâfâtından nefs-i Karamürsel’de sâkin Osman b. Mehmed mahfil-i kazâda Dârü’s-saltanatü’s-seniyye Kostantıniyyeti’l-mahmiyede sabıkā mi‘mârbaşı olan iftihârü’l-emâcid ve’l-ekârim câmi‘ü’l-mehâmid ve’l-mekârim Kasım Ağa b. Ali taraf-ı şerîflerinden ikrâr-ı âti’l-beyânı tasdîka vekîl olup vekâleti hasm-ı câhid-i şer‘î mahzarında Hasan Bey b. Mehmed ve Hasan Beşe b. Hüseyin şehâdetleri ile şer‘an sâbite olan işbu bâ‘isü’l-kitâb Mustafa Efendi b. Osman mahzarında ikrâr u i‘tirâf edip zikr olunan Karamürsel nâhiyesine tâbi‘ Saraycık nâm karye sınırında vâki‘ cevânib-i erba‘ası mezbûr Hasan Bey yerleri ve el-Hâc Hasan yerleri ve tarîk-i âm ve sâhil-i bahr ile mahdûd olup birbirine mülâsık olan eşcâr-ı müsmire-i mütenevvi‘ayı muhtevî bir kıt‘a mülk bağçe ve bir kıt‘a mülk bağımı cümle tevâbi‘ ve levâhıkıyla müvekkil-i müşârun-ileyh hazretlerine bin kıt‘a riyâlî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bi-safkatin vâhidetin bey‘ edip onlar dahi iştirâ ve kabûl eyleyip ve yine zikr olunan bağ ve bağçeye muttasıl olup kezâlik birbirlerine mülâsık olan üç kıt‘a bostan [28a] yerlerimin dahi hakk-ı tasarruflarını iki yüz kıt‘a riyâlî guruş bedel mukābelesinde sâhib-i arz ma‘rifetiyle tefvîz edip onlar dahi tefevvüz ve kabûl eyleyip semen-i mezbûr ile bedel-i merkūmdan müctemi‘ olan bin iki yüz kıt‘a riyâlî guruşu müvekkil-i mûmâ-ileyh hazretleri yedlerinden bi’t-tamam ve’l-kemâl ahz u kabz eylediğimden sonra zikr olunan bağ ve bağçe ve bostan yerlerini mahallinde tesellüm ve zabt ve tasarrufa müşteri-i mûmâ-ileyhi teslît eyledim dedikde mukırr-ı merkūm Osman Çelebi’yi ikrâr-ı meşrûhunda vekîl-i mersûm Mustafa Efendi vicâhen tasdîk ve şifâhen tahkīk etmeğin mâ-hüve’l-vâki‘ gıbbe’t-taleb ketb olundu. Fi’l-yevmi’t-tâsi‘ mine’l-Muharremi’l-harâm li-sene erba‘a ve sittin ve elf. Şuhûdü’l-hâl: Hasan Efendi b. ( ), Mehmed Bey an-çavuşân-ı dergâh-ı âlî, Osman Çelebi el-kâtib, Solak Hasan Bey kethüdâ-yı çiftlik, Mustafa câbî-i vakf, Mısırlı Hasan Bey er-râcil, Ali Çelebi der-sâkin-i karye-i Tepe, el-Hâc Hasan b. el-Hâc Hüseyin, Ali Beşe b. Mehmed, İbrahim b. Davud ve gayruhum.