Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 155 Hüküm no: 179 Orijinal metin no: [28a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Şaban Beşe’nin Mehmed Beşe’ye olan borcunu ödediği Zümre-i râcilînden Mehmed Beşe b. Mahmud nâm kimesne mahfil-i kazâda yine zümre-i râcilînden el-Hâc Şa‘ban Beşe b. Abdullah nâm râcil tarafından ikrâr-ı âti’l-beyânı tasdîka vekîl olup mumcu tâifesinden İbrahim Beşe b. Abdülbâki ve Hasan Beşe b. Abdullah nâm kimesneler şehâdetleriyle şer‘an vekâleti sâbite olan işbu bâ‘isü’l-kitâb Mehmed Beşe b. Murad nâm kimesne muvâcehesinde ikrâr-ı tâm ve takrîr-i kelâm edip mezbûr Mehmed Beşe’nin müvekkili olan mezbûr el-Hâc Şa‘ban zimmetinde cihet-i deyn-i şer‘îden yetmiş beş riyâlî guruş hakkım olup taleb eylediğimde beynimizde münâza‘ât-ı kesîre vâkı‘a olmuş idi. El-hâletü hâzihî beynimizde muslihûn tavassut edip bizi bin akçe üzerine inşâ-i akd-i sulh ettiklerinde ben dahi sulh-i mezbûru kabûl ve bedel-i sulh olan bin akçeyi vekîl-i mezbûr yedinden bi’t-tamam ve’l-kemâl ahz u kabz eyleyip meblağ-ı bâkīden müvekkil-i mezbûr el-Hâc Şa‘ban Beşe’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim, ba‘de’l-yevm mazmûn-ı şer‘îye muhâlif benden asâleten veyâ vekîlimden vekâleten da‘vâ sudûr ederse lede’l-hükkâmi’l-kirâm zevi’l-ihtirâm istimâ‘ ve ısgā olunmasın dedikde mukırr-ı mezbûr Mehmed Beşe’nin cârî olan kelimâtını vekîl-i mezbûr vicâhen tasdîk ve şifâhen tahkīk etmeğin mâ-vaka‘a bi’t-taleb ketb ü sebt olundu. Fi’t-tâsi‘ mine’l-Muharremi’l-harâm li-sene erba‘a ve sittin ve elf. Şuhûdü’l-hâl: İbrahim Nebi b. Davud, Rıdvan Beşe b. Abdullah, Pîrî Beşe b. Hüseyin, Halil Beşe b. Lütfullah ve gayruhum mine’l-huzzâr.