Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 156 Hüküm no: 181 Orijinal metin no: [28a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamza b. Veli’nin Küre-i nühas’a bağlı Kamasna köyündeki ev, tarla ve çayırlara ait hissesini kardeşi Hacı’ya sattığı Vilâyet-i Anadolu’da Küre-i nuhâs kazâsına tâbi‘ Kamasna nâm karyede olup mahmiye-i İstanbul’da Gül Câmi‘-i şerîfi kurbünde Molla Hüsrev Mahallesi’nde mütemekkin olan Hamza b. Veli nâm kimesne mahfil-i kazâda li-ebeveyn karındaşı râfi‘u’l-kitâb <> Hacı mahzarında ikrâr-ı tâm ve takrîr-i kelâm edip babamız merkūm Veli’den bizim ikimize irsen intikāl edip karye-i mezbûrede vâki‘ cevânib-i erba‘ası Süleyman ve Osman ve Receb ve Vildan? nâm kimesneler menzilleri ile mahdûd olup bir bâb tahtânî çatma odayı ve anbar ve muhavvatayı müştemil olan menzilden nısf hisse-i şer‘iyye-i şâyi‘amı bin nakd râyic fi’l-vakt fıddî akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi minvâl-i muharrer üzere iştirâ ve kabûl edip yine tasarrufu babamızdan mezbûr Veli’den müntakil olup karye-i mezbûre sınırı dâhilinde mevâzi‘-i müteferrikada vâki‘ lede’l-cîrân herbiri ma‘lûmü’l-hudûd olan on iki kıt‘a tarla ve iki kıt‘a çayırlardan dahi nısf hisse-i şer‘iyye-i şâyi‘alarının dahi hakk-ı tasarrufların sâhib-i arz ma‘rifetiyle üç bin mezbûru’n-na‘t akçe bedel mukābelesinde tefvîz edip ol dahi kabûl eyleyip semen-i mezbûr ile bedel-i merkūmdan müctemi‘ olan dört bin akçeyi yedinden tamamen ahz u kabz eylediğimden sonra mahallinde tesellüm ve zabt ve tasarrufa merkūm Hacı’yı teslît eyledim, menzil-i mezbûrda ve tarlalarda ve çayırlarda min-ba‘d benim alâka ve medhalim kalmadı, mezbûr Hacı keyfe mâ yeşâ’ ve yehtâr mutasarrıf olsun dedikde gıbbe’t-tasdîk mâ-vaka‘a bi’t-taleb ketb olundu. Fi’l-yevmi’s-sânî aşer mine’l-Muharremi’l-harâm sene erba‘a ve sittin ve elf. Şuhûdü’l-hâl: Mehmed b. Siyâmî, Hüseyin b. Süleyman, Mehmed b. Ahmed, Ahmed b. Receb, Mehmed b. Süleyman, Mehmed b. Mustafa, Mehmed b. Kadir, İsa b. Mehmed, Ali b. Ahmed ve gayruhum.