Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 157 Hüküm no: 182 Orijinal metin no: [28b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mihal v. Nikola’nın Mayer v. Abraham’dan alacağı konusundaki davaya sulh bedeli karşılığı son verildiği Sönbeki bekçilerinden Mihal v. Nikola nâm zimmî mahfil-i kazâda işbu bâ‘isü’r-rakīm Rodoslu Mayer v. Abraham nâm Yahûdi muvâcehesinde ikrâr ve takrîr-i kelâm edip mezbûr Mayer’e cihet-i karz-ı şer‘îden yirmi beş riyâlî guruş deynim olup mukābelesinde de bir zirâ‘ı üçer riyâlî guruş kıymetli on sekiz buçuk zirâ‘ mâî çukayı rehine vaz‘ edip yedine teslîm ol dahi irtihân ve tesellüm eyledikden sonra meblağ-ı mezbûru yedinden istîfâ edip ziyânde? nâmıyla beş guruş ve harc nâmıyla yedi buçuk guruş zikr olunan on sekiz buçuk zirâ‘ çuka yedinde kalmağla hâlâ da‘vâ ve taleb eylediğimde mezbûr Mayer meblağ-ı mezbûru vech-i muharrer üzere istîfâ ve zikr olunan çukayı irtihân ve tesellüm eylediğini inkâr etmekle ben dahi mârru’z--zikr üçer guruş kıymetli on sekiz buçuk zirâ‘ mâî çukayı rehin vaz‘ edip ol dahi irtihân ve tesellüm eylediğini Mihal v. Kosta ve Yorgi v. Kosta nâm zimmîlerin şehâdetleri ile hâkim-i muvakkı‘-ı sadrü’l-kitâb huzûrlarında isbât eylediğimden sonra zikr olunan çukayı merkūm Mayer istihlâk etmekle kıymeti olan elli beş buçuk guruşdan yirmi beş guruş deynim hesâb olunup bâkī kalan otuz buçuk guruşu bana edâ etmek üzere merkūm Mayer’e tenbîh olunup hüccet-i şer‘iyye olunmuş idi. El-hâletü hâzihî merkūm Mayer bana yirmi beş guruş vermek üzere benimle sulhe râgıb olmağın ben dahi mezbûr ile sulh olup zikrolunan yirmi beş guruş bedel-i sulhü yedinden tamamen alıp min-ba‘d birbirimizi husûs-ı mezbûra müte‘allik da‘vâdan ibrâ-i âmm-ı kātı‘u’n-nizâ‘ ile ibrâ ve ıskāt eyledik, vechen mine’l-vücûh da‘vâm kalmadı, eğer mazmûn-ı kitâba muhâlif ehad-i tarafeynden âhar üzerine da‘vâ sudûr ederse lede’l-hükkâm istimâ‘ olunmaya dedikde gıbbe’t-tasdîk ve’t-taleb mâ-vaka‘a ketb olundu. Fi’l-yevmi’s-sâdis aşer mine’l-Muharremi’l-harâm sene 1064. Şuhûdü’l-hâl: Pîrî Beşe b. Hüseyin, Mehmed Çelebi b. Hüseyin, Hüseyin Beşe b. Hasan, Mahmud Beşe er-râcil, Ali Beşe b. Mehmed ve gayruhum.