Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 158 Hüküm no: 183 Orijinal metin no: [28b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Abdullah’ın cariyesini azat ettiği Mahmiye-i İstanbul’da Kepenekçi Sinan Mahallesi’nde sâkine Fâtıma bt. Abdullah nâm hatun tarafından ikrâr-ı âti’z-zikre vekîl olup vekâleti mezbûre Fâtıma’yı ma‘rifet-i şer‘iyye ile ârifân olan Ali b. Halil ve Halil b. Mehmed nâm kimesneler şehâdetleriyle sâbite olan Ahmed b. İbrahim nâm kimesne meclis-i şer‘-i hatîr-i lâzımü’t-tevkīrde müvekkile-i mezbûreye rıkkını mu‘terife olan açık kaşlı, orta boylu, koyun elâ gözlü, sarışın, Rusiyyetü’l-asl bâ‘isetü’l-kitâb Mülayim bt. Abdullah mâm câriye-i memlûke muvâcehesinde bi’l-vekâle ikrâr u i‘tirâf edip müvekkile-i mezbûre Fâtıma memlûkesi mevsûfe-i mezbûre Mülayim’i hasbeten lillâhi’l-azîm ve taleben li-merzâti’r-Rab “Yevme lâ yenfa‘u mâlün ve lâ benûn illâ men etallâhe bi-kalbin selim” âzâd ve i‘tâk ve kayd-ı rıkdan ıtlâk eyledi, ba‘de’l-yevm mezbûre Mülayim sâir harâir-i asliyyât gibi hürre olup üzerinde hakk-ı velâdan gayrı hakkı kalmadı dedikde mâ-vaka‘a bi’t-taleb ketb ü sebt olundu. Fi’l-yevmi’s-sâbi‘ aşer mine’l-Muharremi’l-harâm li-sene erba‘a ve sittin ve elf. Şuhûdü’l-hâl: el-Hâc Halil, Mehmed Çelebi b. el-Hâ[c] Halil, es-Seyyid Hüseyin Efendi el-imâm, Ca‘fer Halîfe el-müezzin ve gayruhum mine’l-huzzâr.