Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 158 Hüküm no: 184 Orijinal metin no: [28b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yazıcıbaşı Mehmed Ağa’nın vârislerinden Yusuf’un terekeden alacağı kalmadığı Vilâyet-i Rumeli’nde İlbasan sancağında İşbat kazâsına tâbi‘ Terande? nâm karye ahâlîsinden Yusuf b. Ali nâm kimesne mahfil-i kazâda işbu sâhibü’l-kitâb el-Hâc Ali b. Ahmed nâm kimesne mahzarında ikrâr u i‘tirâf edip mezbûr el-Hâc Ali ile benim li-ebeveyn ammim oğlu olup müteveffâ olan Yazıcıbaşı Mehmed Ağa b. İsa’nın terekesinden bi-hasebi’ş-şer‘ bana intikāl eden nısf hissemi tereke-i müteveffâ-i mezbûra vâzı‘u’l-yed olmağla taleb ve da‘vâ eylediğimde vesâtet-i muslihûn ile yedi bin beş yüz akçeye sulh olup bedel-i sulh olan meblağ-ı mezbûr yedi bin beş yüz akçeyi mezbûr el-Hâc Ali yedinden bi’t-tamam ve’l-kemâl ahz u kabz edip min-ba‘d mezbûr el-Hâc Ali ile mîrâs husûsuna müte‘allika da‘vâ ve nizâ‘ım kalmamışdır, da‘vâ dahi edersem lede’l-hükkâm-ı zevi’l-ihtirâm istimâ‘ ve ısgā olunmasın dedikde gıbbe’t-tasdîkı’ş-şer‘î mâ-vaka‘a gıbbe’t-taleb ketb ü sebt olundu. Fi’l-yevmi’s-sâbi‘ aşer mine’l-Muharremi’l-harâm li-sene erba‘a ve sittin ve elf. Şuhûdü’l-hâl: İbrahim Çelebi b. Davud, Pîrî Bey b. Hüseyin, Rıdvan Beşe b. Abdullah, Halil Beşe b. Lutfullah ve gayruhum mine’l-huzzâr.