Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 159 Hüküm no: 185 Orijinal metin no: [28b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Hüsrev’in kölesini azat ettiği Mahmiye-i İstanbul’da Parmakkapı kurbünde Çadırcı Hasan Mahallesi sükkânından Mehmed b. Hüsrev nâm kimesne tarafından husûs-ı âti’z-zikre vekîl olup Mustafa Efendi b. Mehmed el-imâm ve el-Hâc Fazlı b. Ahmed şehâdetleriyle vekâleti sâbite olan Osman b. İskender nâm kimesne mahfil-i kazâda müvekkil-i mezbûra rıkkını mu‘terif olan açık kaşlı, gök gözlü, orta boylu, Rusiyyü’l-asl Kenan b. Abdullah mahzarında bi’l-vekâle ikrâr u i‘tirâf edip müvekkil-i mezbûr Mehmed memlûkü mevsûf-ı merkūm Kenan’ı hasbeten lillâhi te‘âlâ ve hasbeten li-rûhi rasûlihi’l-mu‘allâ ve rağbeten bi-mâ-kāle’n-nebiyyü’l-muhtâr: “Men a‘taka rakabeten mümineten a‘taka’llâhu te‘âlâ bi-külli udvin minhâ udven minhu mine’n-nâr” âzâd ve i‘tâk ve kayd-ı rıkdan ıtlâk eyledim, ba‘de’l-yevm mezbûr Kenan sâir harâir-i Müslimîn gibi hür olup üzerinde müvekkil-i mezbûrun hakk-ı velâdan gayrı hakkı kalmadı dedikde mâ-vaka‘a bi’t-taleb sebt ü ketb olundu. Tahrîren fi’l-yevmi’s-sâbi‘ aşer mine’l-Muharremi’l-harâm li-sene erba‘a ve sittin ve elf. Şuhûdü’l-hâl: el-Hâc Mustafa b. İbrahim, el-Hâc Mustafa b. Alagöz, Mehmed Bey el-yesârî, el-Hâc İsmail b. el-Hâc Hasan ve gayruhum mine’l-huzzâr.