Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 159 Hüküm no: 186 Orijinal metin no: [29a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Beşe’nin evini Hasan Beşe b. Mehmed’e sattığı Medîne-i İznikmid’de Kertiler? Mahallesi’nde sâkin iken bundan akdem müteveffâ olan Mehmed b. ( ) nâm kimesnenin verâseti sulbî kebîr oğlu Mustafa Beşe nâm kimesne ile sulbiye kızları Fâtıma ve İsmihan ve Âişe ve Havvâ nâm hatunlara münhasıra olduğu şer‘an sâbit ve mütehakkık oldukdan sonra mezbûr Mustafa Beşe mahfil-i kazâda yine medîne-i mezbûrede sâkin işbu sâhibü’l-kitâb Hasan Beşe b. Mehmed nâm kimesne mahzarında ikrâr-ı tâm ve takrîr-i kelâm edip müteveffâ-i mezbûrun muhallefâtından olup meclis-i mezbûrda vâki‘ bir tarafdan Abbas mülkü ve bir tarafdan Hasan Beşe mülkü ve bir tarafdan el-Hâc Ahmed mülkü ve bir tarafdan tarîk-i âm ile mahdûd ve mümtâz bir bâb tahtânî odayı ve cüneyneyi hâvî menzilde olan altı sehmden iki sehm hisse-i şâyi‘ayı mezbûr Hasan Beşe’ye bey‘-i bâtt-ı sahîh-i şer‘î ile dört bin akçeye bey‘ ol dahi iştirâ ve kabûl eyleyip semen-i mersûm dört bin akçeyi mezbûrun yedinden tamamen ahz u kabz eyledikden sonra menzil-i mezbûrda olan hisse-i mezbûreyi mahallinde kabz ve tesellüme mezbûr Hasan Beşe’yi teslît eyledim, ba‘de’l-yevm hisse-i mezbûrede benim kat‘an medhal ve alâkam kalmayıp mülk-i müşterâsı olmuşdur, hasbe-mâ yürîd mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-âşir mine’l-Muharremi’l-harâm li-sene erba‘a ve sittin ve elf. Şuhûdü’l-hâl: Mustafa Beşe b. Memi, el-Hâc Mehmed b. Abdullah, el-Hâc İsa b. İsmail, Mehmed b. Yağmur ve gayruhum mine’l-huzzâr.