Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 160 Hüküm no: 187 Orijinal metin no: [29a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avraham v. İsak’ın Hüseyin Beşe’ye borcu olduğu İşbu sâhibü’l-kitâb Hüseyin Beşe b. Ahmed mahfil-i şer‘-i şerîfde Yahud tâifesinden olup Lupar? cemâ‘atinden olan Avraham v. İsak muvâ[cehe]sinde üzerine da‘vâ edip mezbûr Avraham sermâye edip dükkânda i‘mâl ve ribhinde şerîkler olmak üzere beş yüz guruş def‘ ve teslîm eylemiş idim, hâlâ ribhinden bana âid olan sekiz bin akçeyi ahz edip asl-ı mâl beş yüz guruşu taleb ederim dedikde mezbûr Avraham istintak olundukda fi’l-hakīka vech-i muharrer üzere müdde‘î-i mezbûra sekiz yüz akçe fâideden hissesini teslîm edip asl-ı mâl olan beş yüz guruş hâlâ zimmetimde bâkī edâsı lâzım deynimdir deyü ikrâr u i‘tirâf eyledikde edâsına tenbîh-birle mâ-vaka‘a bi’t-taleb ketb ü sebt olundu. Tahrîren fi’l-yevmi’s-sâdis aşer mine’l-Muharremi’l-harâm min-şühûr li-sene erba‘a ve sittin ve elf. Şuhûdü’l-hâl: Hüseyin Beşe b. Hasan çukadâr, Muslı Çelebi b. Mustafa, Pîrî Bey b. Hüseyin, Mehmed Çelebi b. Hüseyin.