Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 160 Hüküm no: 188 Orijinal metin no: [29a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf Bey’in Mustafa b. Receb’e para vererek çiftliğini aldığına dair iddiasını ispatlayamadığı <> Ebnâ-i sipâhîyândan Yusuf Bey b. Abdullah nâm kimesne meclis-i şer‘-i hatîr-i lâzımü’t-tevkīrde bâ‘isü’l-kitâb Mustafa b. Receb mahzarında üzerine da‘vâ ve takrîr-i kelâm edip târîh-i kitâbdan beş sene mukaddem mezbûr Mustafa vilâyet-i Rumeli’nde Kumurcine [Gümülcine] kazâsına tâbi‘ Karmış nâm karyede vâki‘ lede’l-ahâlî ve’l-cîrân ma‘lûmü’l-hudûd çiftliğini cemî‘-i tevâbi‘ [ve] levâhıkı ile beş bin akçeye bana bey‘ ve tefvîz ben dahi tefevvüz eylediğimden sonra meblağ-ı mezbûru bi’t-tamam benden ahz u kabz etmiş idi. Hâlâ tasarrufu müyesser olmamağla meblağ-ı mezbûr beş bin akçeyi merkūm Mustafa’dan taleb ederim, suâl olunsun dedikde gıbbe’s-suâl mezbûr Mustafa müdde‘î-i merkūmdan meblağ-ı mezbûrun ahz u kabz eylediğini inkâr edicek müdde‘î-i mezbûrdan sıdk-ı makāline beyyine taleb olundukda ityân-ı beyyineden ızhâr-ı acz ile istihlâf etmeğin mezbûr Mustafa’ya müdde‘î-i mezbûrdan vech-i muharrer üzere beş bin akçe almadığına yemîn teklîf olundukda ol dahi hasebi’l-mesûl yemîn bi’llâhi te‘âlâ ettikden sonra mûcebince mezbûr Yusuf Bey bî-vech ta‘arruzdan men‘ olunup mâ-vaka‘a bi’t-taleb ketb ü sebt olundu. Tahrîren fi’l-yevmi’s-sâlis ve’l-ışrîn mine’l-Muharremi’l-harâm li-sene erba‘a ve sittin ve elf. Şuhûdü’l-hâl: İbrahim Çelebi b. Davud, Pîrî Bey b. Hüseyin, Derviş Bey b. Ali, el-Hâcı? Mehmed ve gayruhum mine’l-huzzâr.