Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 161 Hüküm no: 190 Orijinal metin no: [29b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Patrik Yani kiyozun Mehmed Efendi’ye olan borcuna bazı metrepolidlerin kefil olduğu Husûs-ı âti’l-beyânın mahallinde tahrîri için bi’t-taleb irsâl olunan mevlânâ Mehmed Efendi b. el-Hâc Mustafa zeyl-i kitâbda isimleri mastûr olan Müslimîn ile mahmiye-i İstanbul’da Demirkapı kurbünde hâlâ ağa hasekisi olan bâ‘isü’l-kitâb Ferhad Bey b. Hasan nâm bostancı menziline varıp akd-i meclis-i şer‘-i şerîf olundukda hâlâ patrik olan Yani kiyoz v. Manoli meclis-i mezbûrda merkūm Ferhad Bey muvâcehesinde ikrâr-ı tâm ve takrîr-i kelâm edip târîh-i kitâbdan yüz kırk gün tamamına müeccel ve mev‘ûd cihet-i şer‘iyyeden beş yüz altın ve bin riyâlî guruş ki mecmû‘u iki bin guruş olur deynim olup ecel-i mezbûr tamamında zimmetimde edâsı lâzım deynimdir dedikde gıbbe’t-tasdîkı’ş-şer‘î meblağ-ı mezbûr iki bin guruşa Kayseriye metrepolidi Ahmon v. Papa Yani ve Ereğli metrepolidi Mendeyo v. Manoli ve Kapıdağı metrepolidi Anto v. Azgo Royani ve İznikmid metrepolidi Terpotor v. Mihal ve Kadıköyü metrepolidi Gavril v. Yorgi ve Edirne metrepolidi Navafte v. Yorgi ve Filibe metrepolidi Gavril v. İstifane ve Bursa metrepolidi Menahem v. Yorgi nâm râhibler herbiri emr ve kabûlü hâviye kefâlet ile kefîl bi’l-mâl olduklarında vâki‘ hâli mevlânâ-yı mezbûr mahallinde tahrîr ve meclis-i şer‘de inhâ ve takrîr etmeğin mâ-vaka‘a sebt ü ketb olundu. Fi’l-ışrîn fi’l-Muharremi’l-harâm li-sene erba‘a ve sittin ve elf. Şuhûdü’l-hâl: Mustafa Efendi kethüdâ-yı İlhan Ağa, Yörükân Ali Bey tâbi‘-i İlhan Ağa, Abdülkerim Efendi el-kādı, Kurd Efendi el-kādı, Hüseyin Çavuş b. Mehmed Ağa.