Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 162 Hüküm no: 191 Orijinal metin no: [29b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Salamon v. Yakob’un cariyesini azat ettiği Mahmiye-i İstanbul’da Yahûdi tâifesinden olup Portugal cemâ‘atinden olan Salamon v. Yakob tarafından husûs-ı âtîye vekîl olup Dimitri v. Denardo ve Pendari v. Mihal nâm zimmîler şehâdetleriyle vekâleti sâbite olan Moruhoy v. Sim nâm Yahûdi mahfil-i şer‘-i şerîfde müvekkil-i mezbûr Salamon’a rıkkını mu‘terife olan açık kaşlı, gök gözlü, uzun boylu, sol gözü alîle olup Moskoviyyetü’l-asl olan hâfızatu’r-rakīm Zanvile bt. İstefan nâm câriye-i memlûke muvâcehesinde bi’l-vekâle ikrâr u i‘tirâf edip müvekkilim mezbûr Salamon memlûke-i mevsûfe-i mezbûre Zanvile lâ li ivazin ‘âcil ve lâ li garazin âcil âzâd ve i‘tâk ve kayd-ı rıkdan ıtlâk eyledi, ba‘de’l-yevm mezbûre Zanvile sâir harâir-i asliyyât gibi hürre olup üzerinde hakk-ı velâdan gayrı hakkı kalmadı dedikde mâ-vaka‘a bi’t-taleb sebt ü ketb olundu. Fi’l-yevmi’s-sâdis ve’l-ışrîn min-Muharremi’l-harâm li-sene erba‘a ve sittin ve elf. Şuhûdü’l-hâl: Hüseyin Beşe b. Hasan çukadâr, Pîrî Beşe b. Hüseyin, Mehmed Çelebi b. Hüseyin, İbrahim Çelebi b. Davud, Ali Bey b. Mehmed ve gayruhum mine’l-huzzâr.