Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 162 Hüküm no: 192 Orijinal metin no: [29b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Çelebi b. Nasuh’un Mehmed Efendi’den alacağı konusunda sulh bedeli karşılığında anlaşma sağlandığı Mahmiye-i İstanbul’da Nişancı Mahallesi’nde sâkin İbrahim Çelebi b. Nasuh mahfil-i kazâda işbu bâ‘isü’l-kitâb Mehmed Efendi b. Hayreddin tarafından ikrâr-ı âti’l-beyânı tasdîka vekîl-i sâbitü’l-vekâleti olan Ca‘fer Çelebi b. Abdurrahman mahzarında ikrâr u i‘tirâf edip müvekkil-i mezbûr Mehmed Efendi zimmetinde cihet-i şer‘iyyeden elli bin kâsid akçe hakkım olup meblağ-ı mezbûrdan yirmi sekiz bin akçesini yedinden alıp bâkī kalan yirmi iki bin kâsid akçenin hâlâ râyic olan akçe ile altından kıymet-i şer‘iyyesini mezbûr Mehmed Efendi’den taleb ve da‘vâ sadedinde iken beynimizde münâza‘ât-ı kesîre vâkı‘a olmuş idi. El-hâletü hâzihî tavassut-ı Müslimîn ile beş bin nakd râyic fi’l-vakt fıddî akçeye mûmâ-ileyh Mehmed Efendi ile sulh olup bedel-i sulh olan meblağ-ı merkūm beş bin mezbûru’n-na‘t akçeyi yedinden bi’t-tamam ve’l-kemâl ahz u kabz edip merkūm Mehmed Efendi’yi husûs-ı mezbûra müte‘allika da‘vâ ve mutâlebe ve eymân ve muhâsamadan ibrâ-i âmm-ı kātı‘u’n-nizâ‘ ile ibrâ ve ıskāt eyledim min-ba‘d mezbûr Mehmed Efendi ile da‘vâ ve talebim ve nizâ‘ ve husûmetim kalmadı, eğer bir tarîkle mazmûn-ı kitâba muhâlif da‘vâ dahi edersem lede’l-hükkâmi’l-kirâm istimâ‘ ve ısgā olunmaya dedikde vekîl-i mezbûr vicâhen tasdîk ve şifâhen tahkīk etmeğin mâ-vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min-Zilhicceti’ş-şerîfe li-sene selâse ve sittin ve elf. Şuhûdü’l-hâl: Eş-şeyh Mehmed Efendi el-vâ‘iz bi-Câmi‘-i Süleymâniye, Mustafa Efendi hatîb-i câmi‘-i Mesih Paşa, diğer Mustafa Efendi emîn-i hükkâm sâbıkā , Hüseyin Çelebi el-müezzin, Musa b. Mustafa, Mehmed b. Ali ve gayruhum.