Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 163 Hüküm no: 194 Orijinal metin no: [30a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Yusuf’un çocuklarının terekeyi elinde bulunduran vasileri Mustafa’nın oğlu Musa’dan aldıkları Mahmiye-i İstanbul’da Karabaş nâm mahallede sâkin olup bundan akdem vefât eden merhûm Yusuf’un sulbiye kebîre kızı Saime asâleten ve sagīre kızı Safiye’nin tesviye-i umûruna kıbel-i şer‘den mansûb hâlâ vasî olan Ali Bey b. Abdullah vesâyeten mahfil-i kazâda mezbûretânın mukaddemâ vasîleri olup fevt olan Mustafa’nın muhallefâtına vâzı‘u’l-yed olan sulbî kebîr oğlu işbu bâ‘isü’l-kitâb Musa nâm kimesne mahzarında herbiri ikrâr ve takrîr-i kelâm edip hâlâ yedimizde olup bin altmış senesi Cemâziyelâhiresi’nin beşinci günü ile müverraha ol târîhde bâb nâibi olan Abdülbâki Efendi’nin imzâ ve hatemini müştemil olan hüccet-i şer‘iyye mûcebince merkūm Mustafa’nın hâl-i sıhhatinde makbûzu olan sagīre-i mezbûrenin on dört bin sekiz yüz altmış akçe hakkı vasiyy-i mezbûr Ali Bey vesâyeten ve mezbûre Saime’nin altı bin iki yüz on beş akçe hakkı mezbûre Saime asâleten merkūm Mustafa’nın oğlu mezbûr Musa’dan bi’t-tamam ve’l-kemâl ahz u kabz eyledik, bir akçe ve bir habbe bâkī kalmadı, min-ba‘d da‘vâ ve nizâ‘ımız dahi yokdur dediklerinde gıbbe’t-tasdîk ve’t-taleb mâ-vaka‘a ketb olundu. Fî-gurreti Saferi’l-hayr li-sene erba‘a ve hamsîn ve mi’e ve elf. Şuhûdü’l-hâl: Ca‘fer Çelebi b. Abdullah Kamber, Muslı Çelebi b. Ahmed, Ahmed Beşe b. Hasan, İbrahim Çelebi b. Davud, ve gayruhum mine’l-huzzâr.