Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 164 Hüküm no: 196 Orijinal metin no: [30a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Paşa’nın kölesini kitâbet usûlü ile azat ettiği Emîrü’l-ümerâi’l-kirâm kebîrü’l-küberâi’l-fihâm zü’l-kadri ve’l-ihtirâm sabıkā Rodos sancağına mutasarrıf olan Mehmed Paşa b. el-merhûm Mahmud Paşa tarafından ikrâr-ı âti’l-beyâna vekâleti Mustafa Bey b. Mihman ve Ali Beşe b. Hüseyin şehâdetleriyle şer‘an sâbite olan Mustafa Beşe b. Mehmed mahfil-i kazâda müvekkil-i müşârun-ileyhin abd-i memlûkü olup rıkkına mu‘terif olan orta boylu, açık kaşlı, gök elâ gözlü, arkası çıkık, Efrenciyyü’l-asl râfi‘u’l-kitâb Şamoil v. Uberto nâm İngiliz muvâcehesinde bi’l-vekâle ikrâr ve takrîr-i kelâm edip müvekkil-i mezbûr mevsûf-ı mezbûr Şamoil’i üç yüz kıt‘a riyâlî guruşa kitâbete kesip mezbûr dahi kabûl eylemiş idi. Hâlâ bedel-i kitâbet olan meblağ-ı mezbûr üç yüz riyâlî guruşu bi’t-tamam yedinden ahz u kabz eyledi, ba‘de’l-yevm mevsûf-ı mezbûr sâir ahrâr-ı asliyyîn gibi hür olup üzerinde velâdan gayrı hakkı kalmadı dedikde gıbbe’t-tasdîk bi’t-taleb ketb olundu. Fi’l-yevmi’l-hâdî aşer min-Saferi’l-hayr li-sene erba‘a ve sittin ve elf. Şuhûdü’l-hâl: Hasan Ağa b. Ebîbekir, Mehmed Çelebi b. Mustafa, Hüseyin Beşe b. Hasan çukadâr, Ali Beşe b. Mehmed, Mahmud Beşe b. Veli, Ali Çelebi b. Zülfikār.