Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 165 Hüküm no: 197 Orijinal metin no: [30a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bektaş Bey’in cariyesini azat ettiği Vezâret ile bi’l-fi‘il Kapudan olan düstûr-ı mükerrem müşîr-i müfahham nizâmü’l-âlem Murad Paşa hazretlerinin necl-i necîbi kıdvetü’l- <> ümerâi’l-kirâm umdetü’l-küberâi’l-fihâm Bektaş Bey -zîde kadruhu- taraflarından ıtk-ı âti’l-beyânı ikrâra vekâleti hasm-ı câhid-i şer‘î mahzarında Hüseyin Beşe b. Murad ve Osman Çelebi b. Abdullah şehâdetleri ile şer‘an sâbite olan İbrahim Efendi b. Mehmed el-imâm meclis-i şer‘-i hatîr-i lâzımü’t-tevkīre gelip bi’l-vekâle ikrâr u i‘tirâf edip müvekkil-i müşârun-ileyh silk-i mülkünde muntazam olup rıkkına mu‘terife olan orta boylu, sarışın, gök elâ gözlü, açık kaşlı, Rusiyyetü’l-asl Müslimetü’l-millet râfi‘atü’l-vesîkati’ş-şer‘iyye Cânâne bt. Abdullah nâm câriyesini hasbeten lillâhi te‘âlâ ve hasbeten li-rûhi rasûlihi’l-mu‘allâ mâlından âzâd ve mülkünden ihrâc edip tahrîr ve i‘tâk eyledi, ba‘de’l-yevm mevsûfe-i merkūme sâir ahrâr-ı asliyyât gibi hürre olup üzerinde velâdan gayrı bir şey hakkı kalmadı dedikde vekîl-i mezbûrun ber-vech-i meşrûh cârî ve sâdır olan ikrâr u i‘tirâfı ketb ü terkīm ve mevsûfe-i mezbûrenin yedine def‘ u teslîm olundu. [30b] Fi’l-yevmi’s-sânî aşer min-Saferi’l-hayr li-sene selâse ve sittin ve elf min-hicreti’n-nebeviyye men lehü’l-izzü ve’ş-şeref. Şuhûdü’l-hâl: Ömer Çelebi b. Abdullah er-râcil, Mustafa Beşe b. Abdullah er-râcil, Ali Beşe b. Abdullah er-râcil, Mehmed Beşe b. Abdullah er-râcil, Ali b. Mehmed, Bali Beşe er-râcil, Hüseyin b. Hasan er-râcil, Mahmud Beşe b. Veli er-râcil ve gayruhum mine’l-huzzâr.