Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 166 Hüküm no: 200 Orijinal metin no: [30b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Ağa’nın el-Hâc Mehmed’e verdiği borca kefil olan el-Hâc Ali’nin borcu ödemesi İşbu bâ‘isü’l-kitâb el-Hâc Mehmed b. Şahin mahfil-i kazâda el-Hâc Ali b. Solak mahzarında üzerine da‘vâ edip sabıkā Türkmân ağası olan gāib ani’l-meclis Osman Ağa zimmetinde cihet-i karz-ı şer‘îden beş bin dört yüz otuz akçe hakkım olup meblağ-ı mezbûrun cemî‘sine merkūm el-Hâc Ali emr ve kabûlü hâviye kefâlet ile kefîl bi’l-mâl olmuş idi. Hâlâ kefâleti hasebiyle meblağ-ı mezbûru merkūm el-Hâc Ali’den taleb ederim suâl olunsun dedikde gıbbe’s-suâl mezbûr el-Hâc Ali cevâbında fi’l-vâki‘ müdde‘î-i mezbûr el-Hâc Mehmed’in cihet-i karz-ı şer‘îden gāib-i mezbûr Osman Ağa zimmetinde olan meblağ beş bin dört yüz otuz akçe hakkının cem‘îsine emr ve kabûlü hâviye kefâlet ile ben kefîl bi’l-mâl oldum deyü bi-tav‘ihi ikrâr u i‘tirâf etmeğin mûcebince meblağ-ı mezbûru kefâleti hasebiyle müdde‘î-i merkūma edâ etmek üzere mezkûr el-Hâc Ali’ye tenbîh olunup mâ-hüve’l-vâki‘ gıbbe’t-taleb ketb ü sebt olundu. Fi’l-yevmi’s-sâmin aşer min-Saferi’l-hayr li-sene erba‘a ve sittin ve elf. Şuhûdü’l-hâl: İbrahim Çelebi b. Davud, Hüseyin Beşe b. Hasan, Pîrî Beşe b. Hüseyin, Ramazan b. Musa.