Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 167 Hüküm no: 201 Orijinal metin no: [30b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şemoil’in verdiği borca kefil olan Yasan’ın borcu ödemesi gerektiği Mahmiye-i İstanbul’da meyhâneci tâifesinden işbu bâ‘isü’r-rakīm Pavli v. Nikola nâm zimmî mahfil-i kazâda Yasan v. Mosi nâm Yahûdi muvâcehesinde üzerine da‘vâ edip mezbûrun karındaşı işbu hâzır bi’l-meclis Şemoil zimmetinde cihet-i karz-ı şer‘îden otuz dört kıt‘a riyâlî guruş hakkım olup meblağ-ı mezbûrun cemî‘sine merkūm Yasan târîh-i kitâbdan dört sene mukaddem emr ve kabûlü hâviye kefâlet ile kefîl bi’l-mâl olmuş idi. Zikrolunan otuz dört guruş hakkımı kefâleti hasebiyle merkūm Yasan’dan taleb ederim suâl olunsun dedikde gıbbe’s-suâl ve akībe’l-inkâr müdde‘î-i mezbûrdan müdde‘âsına muvâfıka beyyine taleb olundukda udûl-i Müslimîn’den Abdünnebi b. Haydar ve Mehmed b. Abdullah nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûr Yasan müdde‘î-i mezbûrun işbu Şemoil zimmetinde olan meblağ-ı mezbûr otuz dört guruş hakkının cem‘îsine emr ve kabûlü hâviye kefâlet ile târîh-i kitâbdan dört sene mukaddem bizim huzûrumuzda kefîl bi’l-mâl oldu, biz bu husûsa bu vech üzere şâhidleriz şehâdet dahi ederiz deyü herbiri edâ-yı şehâdet-i şer‘iyye ettiklerinde ba‘de’t-ta‘dîl ve’t-tezkiye şehâdetleri makbûle olmağın mûcebince hükm-birle mâ-vaka‘a gıbbe’t-taleb ketb ü sebt olundu. Tahrîren fi’l-yevmi’s-sâdis aşer min-Saferi’l-hayr li-sene erba‘a ve sittin ve elf. Şuhûdü’l-hâl: Pîrî Beşe b. Hüseyin, İbrahim Çelebi b. Davud, Derviş b. Ali, Ramazan Beşe b. Yusuf ve gayruhum mine’l-huzzâr.