Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 167 Hüküm no: 202 Orijinal metin no: [31a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Ağa’nın kölesini azat ettiği Mahmiye-i İstanbul’da bi’l-fi‘il gümrük emîni olan umdetü’l-a‘yân makbûlü’l-kadr ve’l-erkân Hasan Ağa b. Abdülmennan tarafından ıtk-ı âti’l-beyânı ikrâra vekîl olup Mustafa Bey b. Mahmud ve Ali Bey b. Mustafa şehâdetleri ile şer‘an vekâleti sâbite Abdi Çelebi b. <> Mehmed meclis-i şer‘-i hatîr-i lâzımü’t-tevkīrde müvekkil-i mûmâ-ileyh Hasan Ağa’nın silk-i mülkünde münzelik olup rıkkına mu‘terif olan işbu açık kaşlı, kara gözlü, orta boylu, zenciyyü’l-asl sâhib-i hâze’l-kitâb Mustafa b. Abdullah nâm abd-i memlûkü mahzarında bi’l-vekâle ikrâr-ı tâm ve takrîr-i kelâm edip müvekkil-i mûmâ-ileyh mevsûf-ı mezbûr Mustafa’yı hasbeten lillâhi te‘âlâ ve hasbeten li-rûhi rasûlihi’l-mu‘allâ ve ragabeten bi-mâ-kāle’n-nebiyyü’l-muhtâr: “Men a‘taka rakabeten mümineten a‘taka’llâhu te‘âlâ bi-külli udvin minhâ mine’n-nâr” âzâd ve i‘tâk ve kayd-ı rıkdan ıtlâk ve ihrâc ve kazâ-i hürriyete idrâc eyledi, ba‘de’l-yevm mezbûr Mustafa sâir ahrâr-ı asliyyîn gibi hür olup üzerinde hakk-ı velâdan gayrı hak kalmadı dedikde mâ-vaka‘a bi’t-taleb ketb olundu. Tahrîren fi’l-yevmi’s-sâdis aşer min-Saferi’l-hayr li-sene erba‘a ve sittin ve elf. Şuhûdü’l-hâl: Bayram Çelebi b. Abdullah, Abdi Efendi b. Abdullah, Hafız Efendi b. Yusuf, Mehmed b. Abdullah, Pîrî b. Hüseyin, İbrahim Çelebi b. Davud, el-Hâc Şa‘ban el-muhzır, Derviş b. Ali, Mehmed el-muhzır, Muharrem el-muhzır, Musa el-muhzır ve gayruhum mine’l-huzzâr.