Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 168 Hüküm no: 203 Orijinal metin no: [31a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Osman’ın borcunu ödemesi Tüccâr tâifesinden işbu bâ‘isü’l-kitâb Abdülbâki b. Musa nâm kimesne meclis-i şer‘-i hatîr-i lâzımü’t-tevkīrde Mustafa b. Osman nâm kimesne muvâcehesinde üzerine da‘vâ ve takrîr-i kelâm edip mezbûr Mustafa zimmetinde yedimden müşterâ ve makbûz bostan bahâsından sekiz yüz altmış akçe hakkım vardır, suâl olunup alıverilmek matlûbumdur dedikde gıbbe’s-suâl mezbûr Mustafa cevâbında fi’l-vâki‘ müdde‘î-i mezbûr Abdülbâki’ye vech-i mübeyyen üzere yedinden müşterâ ve makbûz bostan bahâsından zimmetimde sekiz yüz altmış akçe lâzımü’l-edâ ve vâcibü’l-kazâ deynim vardır deyü ikrâr u i‘tirâf etmeğin ikrârı mûcebince meblağ-ı mezbûr sekiz yüz altmış akçeyi müdde‘î-i merkūm Abdülbâki’ye edâ ve teslîm etmek üzere mezbûr Mustafa’ya tenbîh olundu. Tahrîren fi’l-yevmi’s-sâbi‘ aşer min-Saferi’l-hayr li-sene erba‘a ve sittin ve elf. Şuhûdü’l-hâl: Hüseyin Beşe b. Hasan çukadâr, İbrahim Çelebi b. Davud, el-Hâc Şa‘ban b. ( ) el-muhzır, Köse Ahmed el-muhzır ve gayruhum mine’l-huzzâr.