Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 170 Hüküm no: 207 Orijinal metin no: [31b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Abdullah Beşe’nin vârislerinden Mustafa’nın terekeden alacağı kalmadığı Vilâyet-i Anadolu’da Zeytun kazâsına tâbi‘ Kozca nâm karye ahâlîsinden olup mahmiye-i İstanbul’da Elvanzâde [Mahallesi’nde] mütemekkin iken bundan akdem fevt olan Abdullah Beşe b. Bahtiyar’ın verâseti sulbî sagīr kızı Meryem ile usûbet-i nesebiye cihetinden ibn-i ammileri Mustafa b. Bali ve diğer Mustafa b. Ali Efendi ve Süleyman b. Kasım nâm kimesnelere münhasıra olduğu şer‘an sâbit ve mütehakkık oldukdan sonra merkūm Mustafa b. Bali mahfil-i kazâda sagīre-i mezbûre Meryem’in tesviye-i umûruna vasiyy-i muhtâr <> olup müteveffâ-i mezbûrun muhallefâtına vâzı‘u’l-yed olan işbu bâ‘isü’l-kitâb Ahmed b. Mustafa mahzarında ikrâr ve takrîr-i kelâm edip muhallefât-ı müteveffâ-i mezbûrdan olup mahalle-i merkūmede vâki‘ ma‘lûmü’l-hudûd menzil vesâir ism-i mâl ıtlâk olunur eşyâdan benim hisse-i şer‘îden isâbet eden on bir bin akçenin beş bin akçesini mukaddemâ vekîlim olan Ömer b. Mehmed yedinden ve altı bin akçesini dahi hâlâ vasiyy-i mezbûr Ahmed yedinden bi’t-tamam ve’l-kemâl ahz u kabz edip mûrisim müteveffâ-i mezbûrun menzil-i mezkûru vesâir celîl ü hakīr ve kalîl ü kesîr muhallefâtına müte‘allik da‘vâdan vasiyy-i mezbûrun ve sagīre-i mezbûrenin zimmetlerini ibrâ-i âmm-ı kātı‘u’n-nizâ‘ ile ibrâ ve ıskāt eyledim, min-ba‘d husûs-ı mezbûra müte‘allik da‘vâ ve nizâ‘ ve husûmet kalmadı, ba‘de’l-yevm mazmûn-ı kitâba muhâlif bir tarîkle benden asâleten ve vekâleten da‘vâ sudûr ederse lede’l-hükkâm istimâ‘ olunmaya dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-ışrîn min-Saferi’l-hayr li-sene erba‘a ve sittin ve elf. Şuhûdü’l-hâl: Said Efendi b. İsa Efendi, Mehmed Dede b. Hüsam, Süleyman Bey b. Şa‘ban el-cündî, Receb b. Ahmed, Halil Çelebi b. Hüseyin, Abdüllatif Çelebi b. Ahmed, el-Hâc Mustafa b. Şa‘ban, İsmail Çelebi [b.] el-Hâc Şa‘ban?, Abdullah Çelebi b. Mehmed ve gayruhum.