Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 170 Hüküm no: 208 Orijinal metin no: [31b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Abdullah Beşe’nin vârislerinden Süleyman’ın terekeden alacağı kalmadığı Vilâyet-i Anadolu’da Zeytun kazâsına tâbi‘ Kozca nâm karye ahâlîsinden olup mahmiye-i İstanbul’da Elvanzâde Mahallesi’nde sâkin iken bundan akdem fevt olan Abdullah Beşe b. Bahtiyar’ın verâseti sulbiye sagīre kızı Meryem ile usûbet-i nesebiye cihetinden ibn-i ammileri Mustafa b. Bali, Mustafa Çelebi b. Ali Efendi ve Süleyman b. Kasım nâm kimesnelere münhasıra olunduğu mütehakkık oldukdan sonra merkūm Süleyman b. Kasım mahfil-i kazâda sagīre-i mezbûre[nin] vasiyy-i muhtârı olan müteveffâ-i mezbûrun muhallefâtına vâzı‘u’l-yed olan işbu bâ‘isü’l-kitâb Ahmed b. Mustafa ikrâr ve takrîr-i kelâm edip muhallefât-ı müteveffâ-i mezbûrdan olup mahalle-i merkūmede vâki‘ ma‘lûmü’l-hudûd menzil vesâir ism-i mâl ıtlâk olunur eşyâdan benim hisse-i şer‘iyyeme isâbet eden on bir bin akçenin beş bin akçesini mukaddemâ vekîlim olan Murad Bey b. Mustafa yedinden ve altı bin akçesini dahi hâlâ vasiyy-i mezbûr Ahmed yedinden tamamen ahz u kabz edip mûrisim müteveffâ-i mezbûrun menzil-i mezkûru vesâir celîl ü hakīr ve kalîl ü kesîr muhallefâtına müte‘allika da‘vâdan vasiyy-i mezbûrun ve sagīre-i mezbûrenin zimmetlerini ibrâ-i âmm-ı kātı‘u’n-nizâ‘ ile ibrâ ve ıskāt eyledim, min-ba‘d husûs-ı mezbûra müte‘allik da‘vâ ve nizâ‘ım kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-mezbûr mine’t-târîhi’l-mezkûr. Şuhûdü’s-sâbıkūn.