Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 171 Hüküm no: 209 Orijinal metin no: [31b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgaki v. Yanaki’nin kendisine ait ve kefâleti sebebiyle olan borçlarını Hasan Efendi’ye ödemesi gerektiği İşbu sâhibü’l-kitâb Hasan Efendi b. Abdullah mahfil-i şer‘-i şerîfde mahrûse-i Galata kazâsına tâbi‘ kasaba-i Beşiktaş’da sâkin olan Yorgaki v. Yanaki nâm zimmî muvâcehesinde üzerine da‘vâ edip mezbûr Yorgaki zimmetinde cihet-i karz-ı şer‘den iki bin râyic fi’l-vakt akçe hakkım olup meblağ-ı mersûm mukābelesinde bana bir balık dişi saplı ve bir yenidünyâ saplı hançerler rehin vaz‘ edip ben dahi irtihân ve kabz eyledikden sonra şerîki gāib ani’l-meclis diğer Yorgaki dahi zimmetinde olan bin akçe hakkıma dahi emr ve kabûlü hâviye kefâlet-i sahîh-i şer‘iyye ile mezbûr Yorgaki kefîl bi’l-mâl olmağın asâlet ve kefâleti cihetlerinden zimmetinde edâsı lâzım olan cem‘an üç bin akçe hakkımı taleb ederim dedikde gıbbe’s-suâl mezbûr Yorgaki cevâbında müdde‘î-i mezbûra ancak yirmi riyâlî guruş deynim vardır deyü ziyâde üç yüz akçeyi ve şerîki gāib-i mezbûr diğer Yorgaki zimmînin nefsine kefîl olmuşdur deyü zimmetinde olan bin akçeye kefîl bi’l-mâl olduğunu inkâr eyledikde gıbbe’l-istişhâd udûl ve sikātdan Mustafa b. Mehmed ve el-Hâc Muharrem b. Kıyas nâm kimesneler li-ecli’ş-şehâde meclis-i şer‘a hâzırân olup fi’l-hakīka müdde‘î-i mezbûr bizim huzûrumuzda mezbûr Yorgaki zimmîye bi-tarîkı’l-karz iki bin akçe def‘ ve teslîm ol dahi tesellüm ve kabz eyledikden sonra şerîkim diğer Yorgaki zimmetinde olan bin akçe hakkıma dahi emriyle kefîl bi’l-mâl olmuşdur, bu husûsa şâhidleriz, şehâdet dahi ederiz deyü herbiri edâ-yı şehâdeti şer‘iyye eylediklerinde ba‘de ri‘âyeti şerâyiti’l-kabûl şehâdetleri hayyiz-i kabûle vusûl bulmağın mûcebiyle asâleti cihetinden iki bin akçe ve kefâleti cihetinden bin akçe cem‘an üç bin akçenin edâsı’çün mezbûr Yorgaki’ye tenbîh olunup mâ-vaka‘a bi’t-taleb sebt ü ketb olundu. Fî-evâsıtı Saferi’l-hayr li-sene erba‘a ve sittin ve elf. Şuhûdü’l-hâl: Mehmed Beşe b. Süleyman çukadâr, Pîrî Beşe b. Hüseyin, İbrahim Çelebi b. Davud, Mehmed Çelebi b. Hüseyin, Rıdvan Beşe b. Abdullah ve gayruhum mine’l-huzzâr.