Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 172 Hüküm no: 210 Orijinal metin no: [32a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Bey ile Ali Bey’in borçları olduğu Gıbbe’t-taleb ve’l-iltimâs cânib-i şer‘-i kaviyyü’l-esâsdan mevlânâ Abdulkādir Efendi irsâl olunup ol dahi mahmiye-i İstanbul’da Bezzâz-ı cedîd Mahallesi’nde Asmalı çeşmesi kurbünde sâkin Rûznâmeci-i hümâyûn halîfelerinden umdetü erbâbi’t-tahrîr ve’l-kalem Celeb Ahmed Halîfe’nin menziline varıp zeyl-i kitâbda mastûrü’l-esâmî olan Müslimîn huzûrlarında akd eylediği meclis-i şer‘-i şerîfde vilâyet-i Anadolu’da medîne-i Kütahya mahallâtından Sultanbağı Mahallesi’nde sâkin Mehmed Bey b. Kurd ve kasaba-i Seyyidgazi’de sâkin Ali Bey b. Ramazan nâm kimesneler mahmiye-i merkūmede Saray-ı atîk-i sultânî tabbâhlarından râfi‘u hâze’l-kitâb Mustafa Bey b. Satılmış mahzarında herbiri ikrâr-ı tâm ve takrîr-i kelâm edip işbu elli beş bin nakd râyic fi’l-vakt fıddî akçeyi merkūm Mustafa Bey’den ikimiz ale’s-seviyye iktirâz ve tesellüm edip meblağ-ı mezbûru târîh-i kitâbdan altı ay tamamına değin edâya müte‘ahhid oldukda meblağ-ı mezbûr elli beş bin akçe cihet-i karz-ı şer‘îden mezbûr Mustafa Bey’e zimmetimizde lâzımü’l-edâ deynimizdir dediklerinde gıbbe’t-tasdîkı’ş-şer‘î vicâhen mâ-vaka‘a bi’t-taleb tahrîr ba‘dehû mevlânâ-yı mezbûr meclis-i şer‘a gelip muhzır İbrahim ile alâ-vukū‘ihî inhâ ve takrîr eylediği ketb ü sebt olundu. Tahrîren fi’l-yevmi’s-sâlis ve’l-ışrîn min-Saferi’l-hayr li-sene erba‘a ve sittin ve elf. Şuhûdü’l-hâl: Mustafa b. Mehmed Ağa, Ömer Ağa b. Mansur, Mehmed Çelebi b. İbrahim, Kenan b. Abdullah, İbrahim Çelebi b. Davud, Ali Çelebi b. Zülfikār ve gayruhum.