Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 172 Hüküm no: 211 Orijinal metin no: [32a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Bey’in Ahmed Halîfe’ye borcu olduğu Gıbbe’t-taleb ve’l-iltimâs cânib-i şer‘-i kaviyyü’l-esâsdan mevlânâ Abdulkādir Efendi irsâl olunup ol dahi mahmiye-i İstanbul’da Bezzâz-ı cedîd Mahallesi’nde Asmalı çeşmesi kurbünde sâkin râfi‘u hâze’l-kitâb Rûznâmeci-i hümâyûn halîfelerinden umdetü erbâbi’t-tahrîr ve’l-kalem Celeb Ahmed Halîfe’nin menziline varılıp zeyl-i kitâbda mastûrü’l-esâmî olan Müslimîn huzûrlarında akd eylediği meclis-i şer‘-i şerîfde mûmâ-ileyh Ahmed Halîfe Saray-ı atîk-i sultânî tabbâhlarından hâzır bi’l-meclis olan Mustafa Bey asâleten elli beş bin nakd râyic fi’l-vakt fıddî akçe ikrâz ve teslîm edip ol dahi meblağ-ı mezbûru iktirâz ve tesellüm eyledikden sonra mezbûr Mustafa Bey meblağ-ı mezbûr elli beş bin akçe cihet-i karz-ı şer‘den mûmâ-ileyh Ahmed Halîfe’ye zimmetinde lâzımü’l-edâ ve vâcibü’l-kazâ deynimdir deyü bi’t-tav‘i’s-sâf ikrâr u i‘tirâf eyledikde mûmâ-ileyh Ahmed Halîfe dahi vicâhen tasdîk ve şifâhen tahkīk eyleyip merkūm Mustafa Bey meblağ-ı mezkûru târîh-i kitâbdan on ay tamamına değin edâya müte‘ahhid olmağın vâki‘ hâli mevlânâ-yı mezbûr mahallinde tahrîr ba‘dehû gelip Muhzır İbrahim ile meclis-i şer‘-i şerîfde vukū‘u üzere inhâ ve takrîr etmeğin mâ-vaka‘a gıbbe’t-taleb ketb ü sebt olundu. Fi’l-yevmi’s-sâlis ve’l-ışrîn min-Saferi’l-hayr li-sene erba‘a ve sittin ve elf. Şuhûdü’l-hâl: Mehmed Ağa b. Mustafa, Ömer Ağa b. Mansur, Mehmed Çelebi b. İbrahim, Kenan b. Abdullah, İbrahim b. Davud, Ali Çelebi b. Zülfikār ve gayruhum mine’l-huzzâr.