Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 173 Hüküm no: 212 Orijinal metin no: [32a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hızır Bali’nin ev ve bağını oğlu Mehmed’e hibe ettiği Vilâyet-i Anadolu’da Pazarköyü kazâsına tâbi‘ Çeltik nâm karye ahâlîsinden Hızır Bali b. Mustafa mahfil-i şer‘-i şerîfde sulbî oğlu olan sâhibü’l-kitâb Mehmed nâm şâbb-ı emred mahzarında ikrâr ve takrîr-i kelâm edip karye-i mezbûrede vâki‘ bir tarafdan Mehmed b. Yusuf mülkü ve bir tarafdan kendi mülküm ve bir tarafdan mâ-i cârî ve bir tarafdan dahi tarîk-i âm ile mahdûd ve mümtâz olup bir bâb fevkānî ve bir bâb tahtânî beyti <> ve üç ahırı ve anbarı ve bağçeyi hâvî mülk menzilimi ba‘de nasbi’l-âlâmeti’l-fâsıla ve yine karye-i mezbûre sınırı dâhilinde vâki‘ bir tarafdan Kaymaz Ahmed mülkü ve bir tarafdan Deli Hüseyin bağı ve bir tarafdan Abdünnebi b. Ca‘fer bağı ve bir tarafdan dahi el-Hâc Yusuf bağı ile mahdûd ve mümtâz olan bir dönüm mülk bağımı oğlum mezbûr Mehmed’e hâl-i sıgārında hibe ve temlîk edip velâyetim hasebiyle yine sagīr-i mezbûr için tesellüm ve kabz eylemiş idim. Oğlum mezbûr Mehmed reşid ve akıl ve bâliğ olmağile menzil-i mahdûd-ı mersûmu ve zikrolunan bağı mezbûr Mehmed’e bir ay mukaddem def‘ ve teslîm ol dahi tesellüm ve kabz eyledi, zikri sebk eden menzil ve bağı oğlum mezbûr Mehmed’in mülk-i mevhûbu olup kat‘an benim alâkam kalmamıştır, hasbe-mâ yürîd mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Tahrîren fî-evâsıtı Saferi’l-hayr li-sene erba‘a ve sittin ve elf. Şuhûdü’l-hâl: el-Hâc Mehmed b. el-Hâc Mahmud, Himmet Beşe b. Bayram, Veli Beşe b. Mahmud, Mehmed Beşe [b.] İbrahim, Hasan Beşe b. Mustafa, Ömer b. Ahmed ve gayruhum.