Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 173 Hüküm no: 213 Orijinal metin no: [32a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimitri v. Yani’nin bağlarını oğlu Kostantin’e sattığı Mahrûse-i Galata kazâsı muzâfâtından Kapıdağı nâhiyesine tâbi‘ Mahanya nâm karye ahâlîsinden Dimitri v. Yani nâm zimmî meclis-i şer‘-i hatîr-i lâzımü’t-tevkīrde sulbî oğlu olan bâ‘isü’r-rakīm Kostantin nâm zimmî muvâcehesinde bi’t-tav‘i’s-sâf ikrâr u i‘tirâf edip karye-i merkūmede vâki‘ bir tarafdan Ahmed Çelebi [b.] Abdullah ve bir tarafdan diğer Ahmed nâm kimesne ve bir tarafdan Ömer nâm kimesne bağları ve bir tarafdan dahi vâdi ile mahdûd olan bir kıt‘a mülk bağımı karye-i merkūme sınırı dâhilinde Ayan nâm mevzi‘de vâki‘ bir tarafdan Romatere? Kesiri? bağı ve bir tarafdan Yakomi bağı [32b] bir tarafdan vâdi ile mahdûd bir kıt‘a mülk bağlarımı mezbûr Kostantin’e tarafeynden îcâb ve kabûlü hâvî bey‘-i kat‘î ile safka-i vâhide ile bey‘ ve ol dahi iştirâ ve kabûl eyledikden sonra yüz kıt‘a riyâlî guruşu mezbûr Kostantin yedinden bi’t-tamam ahz u kabz edip zikrolunan bağları mahallinde kabz ve teslîme mezbûr Kostantin’i teslît eyledim, min-ba‘d benim alâka [ve] medhalim kalmadı, mülk-i müşterâsı olmuşdur, hasbe-mâ yürîd mutasarrıf olsun dedikde gıbbe’t-tasdîkı’ş-şer‘î mâ-vaka‘a ketb ü sebt olundu. Fi’l-yevmi’s-sâmin ve’l-ışrîn min-Saferi’l-hayr li-sene erba‘a ve sittî ve elf. Şuhûdü’l-hâl: İbrahim b. Davud, Mehmed b. Hüseyin, Pîrî b. Hüseyin, Rıdvan Beşe b. Abdullah, Dimitri v. Rato, Karaca v. Yani, Yani v. Koriko ve gayruhum mine’l-huzzâr.