Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 174 Hüküm no: 214 Orijinal metin no: [32b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avraham’ın kızları Sinyora ile Reali’nin alacakları konusunda sulh bedeli karşılığı anlaşmaya vardıkları Mahmiye-i İstanbul’da Çelebioğlu Mahallesi sâkinelerinden Sinyora ve Reali bintey Avraham nâm Yahûdilerin vâlideleri ve husûs-ı âtîye vekîlleri olup Şa‘ban Çavuş b. Ahmed nâm kimesne ile Bünyad v. Menteş Yahûdi şehâdetleriyle vekâleti sâbite olan Sahola bt. Merliye nâm Yahûdiye mahfil-i şer‘-i şerîfde mahrûse-i Galata kazâsına tâbi‘ Kapudağı nâhiyesinde Mahanya nâm karye ahâlîsinden işbu sâhibü’r-rakīm Dimitri v. Yani nâm zimmî muvâcehesinde bi’l-vekâle ikrâr-ı tâm ve takrîr-i kelâm edip müvekkilelerim mezbûretânın mezbûr Dimitri zimmetinde cihet-i şer‘iyyeden olan iki yüz seksen guruş haklarını vekâlet-i mahalliyem [mahkiyem] hasebiyle taleb ve da‘vâ eylediğimde bi’l-külliye inkâr eyleyip beyyine ikāmetine dahi iktidârları olmayıp yemîn teklîfi esnâsında muslihûn tavassut edip iki bin akçe üzerine inşâ-i akd-i sulh eylediklerinde sulh-i mezbûru kabûl ve bedel-i sulh olan iki bin akçeyi ahz ve istîfâ ettik, husûs-ı mezbûra müte‘allika âmme-i da‘vâdan zimmetini ibrâ ve ıskāt eyledim, ba‘de’l-yevm mazmûn-ı kitâba muhâlif da‘vâ sudûr ederse lede’l-hükkâmi’l-kirâm istimâ‘ ve ısgā olunmasın dedikde gıbbe’t-tasdîkı’ş-şer‘î mâ-vaka‘a bi’t-taleb ketb ü sebt olundu. Fî-evâsıtı Saferi’l-hayr min-şühûri sene erba‘a ve sittin ve elf. Şuhûdü’l-hâl: Mehmed Beşe b. Süleyman, Pîrî Beşe b. Hüseyin, Mehmed Çelebi b. Hüseyin, İbrahim Çelebi b. Davud ve gayruhum mine’l-huzzâr.