Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 175 Hüküm no: 215 Orijinal metin no: [32b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Görülen hesap sonunda el-Hâc Mehmed’in hakkını aldığı Mahmiye-i Galata’da Ekmekyemez Mahallesi’nde sâkin el-Hâc Mehmed b. Ömer nâm kimesne mahfil-i kazâda mahmiye-i İstanbul’da Katalan cemâ‘atinden işbu bâ‘iseyü’l-kitâb Yaşua v. Efde ve Salamon v. Ellez nâm Yahûdiler muvâcehelerinde ikrâr ve takrîr-i kelâm edip mezbûrân ile beynimizde nice mu‘âmelât-ı şer‘iyye ve bey‘ ü şirâ ve ahz ü i‘tâ vâki‘ olup hâlâ beynimizde cârî olan mu‘âmelâtı mezbûrân ile huzûr-ı Müslimîn’de hesâb eylediğimizde zimmetlerinde üç yüz elli kıt‘a riyâlî guruş benim hakkım zuhûr edip meblağ-ı mezbûr üç yüz elli kıt‘a riyâlî guruş hakkımı bi’t-tamam ve’l-kemâl yedlerinden ahz u kabz edip târîh-i kitâba gelince cemî‘-i de‘âvî ve mutâlebât ve eymân ve muhâsamâtdan birbirimizi ibrâ-i âmm-ı kātı‘u’n-nizâ‘la ibrâ ve ıskāt eyledik, birbirimiz ile vechen mine’l-vücûh da‘vâ ve nizâ‘ım kalmadı, ba‘de’l-yevm ehad-i tarafeynden âhar üzerine bir tarîk ile mazmûn-ı kitâba muhâlif da‘vâ sudûr ederse lede’l-hükkâmi’l-kirâm istimâ‘ olunmaya dedikde gıbbe’t-tasdîkı’l-mu‘teber mâ-vaka‘a ketb ü sebt olundu. Şuhûdü’l-hâl: Mehmed Çavuş b. Kadri el-mübâşir, el-Hâc Abdurrahman b. Ahmed, el-Hâc Selim b. Mehmed, el-Hâc Said b. Ali, el-Hâc Hüseyin.