Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 175 Hüküm no: 217 Orijinal metin no: [33a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdülbâki Efendi’nin kölesini azat ettiği Gıbbe’t-taleb ve’l-iltimâs cânib-i şer‘-i kaviyyü’l-esâsdan mevlânâ Abdulkādir Efendi irsâl olunup ol dahi mahmiye-i İstanbul -sînet şems sâhibihâ ani’l-ufûl- mahallâtından merhûm Ali Paşa mahallesinde umdetü kuzâti’l-kiram zübdetü vülâti’l-enâm mu‘înü’l-erâmil ve’l-eytâm Abdülbâki Efendi b. el-merhûm Mehmed Efendi’nin sâkin oldukları menzile varıp zeyl-i kitâbda mastûrü’l-esâmî olan Müslimîn huzûrlarında akd-i meclis-i şer‘-i şerîf eyledikde mûmâ-ileyh Abdülbâki Efendi meclis-i mezbûrda imâm temellükü kabza-i tasarruflarında olup rıkkına mu‘terif olan uzun boylu, gök gözlü, açık kaşlı, sarışın Rusiyyü’l-asl râfi‘u hâze’l-kitâb Yusuf b. Abdülvehhab nâm kösec gulâm mahzarında ikrâr-ı sahîh-i şer‘î ve i‘tirâf-ı sarîh-i mer‘î kılıp abd-i memlûküm mevsûf-ı mezbûru niyet-i hâlise-i sâfiye <> ve taviyyet-i tayyibe-i sâdıka ile hasbeten lillâhi’l-meliki’l-Hallâk tahrîr ve i‘tâk edip mülkümden izâle ve ihrâc ve silk-i ahrâr-ı asliyyîne idrâc eyledim, <> min-ba‘d mezbûr Yusuf sâir ahrâr-ı asliyyîn gibi hür olup üzerinde velâdan gayrı bir şey hakkım kalmadı dediklerinde müşârun-ileyh Abdülbâki Efendi’nin ber-vech-i meşrûh cârî ve sâdır olan ikrâr u i‘tirâflarını mevlânâ-yı mezbûr mahallinde tahrîr ba‘dehû zeyl-i kitâbda isimleri mastûr olan ba‘zı Müslimîn ile yine meclis-i şer‘a gelip inhâ ve takrîr etmeğin mâ-hüve’l-vâki‘ alâ-vukū‘ihî ketb ü terkīm ve mevsûf-ı mezbûrun yedine def‘ ü teslîm olundu. Fi’l-yevmi’s-sâmin ve’l-ışrîn min-Saferi’l-hayr li-sene erba‘a ve sittin ve elf. Şuhûdü’l-hâl: Mehmed Efendi el-kādı, fahrü’l-müderrisîn Ahmed Çelebi, Mustafa Halîfe, Hamza Çelebi, Mahmud Çelebi çukadâr.