Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 176 Hüküm no: 218 Orijinal metin no: [33a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsak v. İlya’nın olan borcunu taksitle ödeyeceği Mahmiye-i İstanbul’da Yahûd tâifesinden İsak v. İlya nâm Yahûdi meclis-i şer‘-i hatîr-i lâzımü’t-tevkīrde tâife-i mezbûreden olup Portugal cemâ‘atinden bâ‘isü’r-rakīm Matine v. Akve nâm Yahûdi muvâcehesinde ikrâr-ı tâm ve takrîr-i kelâm edip mezbûr Matine’ye cihet-i şer‘îden bin sekiz yüz doksan akçe deynim olup hâlâ edâya adem-i iktidârım olmağla bir piyâde kayığımın bin iki yüz akçeye mezbûr Matine’ye bey‘ edip deynin ol mikdârına takās eyledikden sonra meblağ-ı bâkī altı yüz doksan akçe deynim haftada yirmi beş akçeye mezbûr Matine taksît ve te’cîl eylemişdir, hâlâ zimmetinde müeccel ve mukassat altı yüz doksan akçe deynim vardır dedikde gıbbe’t-tasdîk mâ-vaka‘a bi’t-taleb ketb olundu. Fi’l-yevmi’s-sâmin ve’l-ışrîn mine’l-Muharremi’l-harâm li-sene erba‘a ve sittin ve elf. Şuhûdü’l-hâl: İbrahim Çelebi b. Davud, Rıdvan b. Abdullah, Hüseyin Beşe b. ( ) çukadâr, Ali Bey b. Mehmed.