Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 176 Hüküm no: 219 Orijinal metin no: [33a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bünyamin v. Peres’in kölesini mükâtebe ile azat ettiği Mahmiye-i İstanbul’da Zeytun cemâ‘atinden Bünyamin v. Peres nâm Yahûdi tarafından husûs-ı âti’l-beyânı ikrâra vekîl olup Frenk cemâ‘atinden Mosi v. İlya ve Küçük İstanbul cemâ‘atinden Salom v. İlya nâm Yahûdiler şehâdetleri ile şer‘an vekâleti sâbite olan Aragon cemâ‘atinden Menteş v. Bayram nâm Yahûdi meclis-i şer‘-i hatîrde müvekkil-i mezbûra rıkk-ı sâbıkına mu‘terife olan orta boylu, elâ gözlü, açık kaşlı, sağ kaşı başında eser-i cerhi var Rusiyyetü’l-asl hâmiletü’s-sifr Paraşka bt. Yako nâm Nasrâniye muvâcehesinde bi’l-vekâle ikrâr ve takrîr-i kelâm edip mevsûfe-i merkūme Parşaka müvekkilim merkūm Bünyamin’in sabıkā câriye-i memlûkesi olup bundan akdem yüz on kıt‘a riyâlî guruş üzerine kitâbete kesmiş idi. Hâlâ bedel-i mezbûr yüz on kıt‘a riyâlî guruşu mezbûrenin yedinden müvekkil-i merkūm Bünyamin tamamen ahz u kabz etmekle min-ba‘d üzerinde hakk-ı velâdan gayrı müvekkil-i mezbûrun hakkı kalmayıp mezbûre Paraşka sâir harâir-i asliyyât gibi hürre oldu dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Tahrîren fî-gurreti şehri Rebî‘i’l-evvel li-sene erba‘a ve sittin ve elf. Şuhûdü’l-hâl: İbrahim Çelebi b. Murtaza, Receb Çelebi b. Hasan, Pîrî Beşe b. Hüseyin, Rıdvan b. Abdullah, Hüseyin b. Mustafa, el-Hâc Şa‘ban b. ( ), Mehmed Çelebi b. Hüseyin, Kemhacı Mehmed Çelebi, Ramazan b. Yusuf, Petre v. Andriya, Asayan v. Yovan ve gayruhum.