Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 177 Hüküm no: 220 Orijinal metin no: [33a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Ağa’nın vârisinin, terekeyi elinde bulunduran Ahmed Ağa’dan malların tamamını aldığı Vilâyet-i Rumeli’nde Delvine kazâsına tâbi‘ Marki nâm karye ahâlîsinden olup mahmiye-i İstanbul’da vâki‘ Şehzâde Sultan Mehmed Hân -aleyhi’r-rahmetü ve’l-gufrân- binâ eylediği tımarhânede bundan akdem müteveffâ olan Hüseyin Ağa b. Ali’nin li-ebeveyn kız karındaşı oğlu ve hasran vârisi olan Yunus b. Aslan meclis-i şer‘-i hatîr-i lâzımü’t-tevkīrde müteveffâ-i mezbûrun muhallefâtına vâzı‘u’l-yed olan Ahmed Ağa b. Abdülmennan muvâcehesinde ikrâr-ı tâm ve takrîr-i kelâm edip müteveffâ-i mezbûr Hüseyin Ağa’nın muhallefâtından ber-mûceb-i defter beynimizde mikdârı ma‘lûm olup ve mezbûr Ahmed Ağa’nın makbûzu olan eşyâyı bi’t-tamam ve’l-kemâl mezbûr Ahmed Ağa yedinden ahz u kabz edip muhallefât-ı müteveffâ-i mezbûra müte‘allika da‘vâ ve nizâ‘ım kalmadı, ba‘de’l-yevm da‘vâ dahi sudûr ederse lede’l-hükkâmi’l-kirâm-ı zevi’l-ihtirâm istimâ‘ ve ısgā olunmasın dedikde, gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi-gurreti şehri Rebî‘i’l-evvel li-sene erba‘a ve sittin ve elf. Şuhûdü’l-hâl: Mahmud Ağa za‘îm, Şahin Ağa sipâhî, Ramazan b. Mehmed, Hasan b. Ali ve Hüseyin b. Ali ve gayruhum.