Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 178 Hüküm no: 221 Orijinal metin no: [33b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Abdullah’ın Hasan Efendi’nin odasından aldığı eşya hususundaki davaya sulh bedeli karşılığı son verildiği Vilâyet-i Rumeli’nde kasaba-i Gümülcine ahâlîsinden olup mahmiye-i İstanbul’da Sultan Selim Hân -aleyhi’r-rahmetü ve’l-gufrân- binâ eylediği Dârü’l-hadîs medresesinde sâkin olan umdetü’l-kuzât Hasan Efendi b. Mustafa meclis-i şer‘-i hatîr-i lâzımü’t-tevkīrde işbu bâ‘isü’l-kitâb Ahmed b. Abdullah muvâcehesinde ikrâr-ı tâm ve takrîr-i kelâm edip târîh-i kitâbdan yirmi gün mukaddem sâkin olduğum odamı mezbûr Ahmed açıp içinde olan eşyâdan bir Kelâm-ı şerîf ve bir dülbend ve bir kazak ve yedi zirâ‘ mor iskerlet çuka ve bir münakkaş sandığımı ahz eyledi deyü taleb ve da‘vâ etmiş idim. El-hâletü hâzihî beynimizde Müslimûn ve muslihûn tavassut edip benim ile an-inkâr iki bin akçe üzerine inşâ-i akd-i sulh eylediklerinde ben dahi sulh-i mezbûru kabûl ve bedel-i sulh olan meblağ-ı mezbûr iki bin akçeyi mezbûr Ahmed’in yedinden bi’t-tamam ahz u kabz edip husûs-ı mesfûra müte‘allika âmme-i da‘vâdan mezbûr Ahmed’in zimmetini ibrâ-i âmm-ı kātı‘u’n-nizâ‘ ile ibrâ ve ıskāt eyledim ba‘de’l-yevm benden asâleten veyâ <> vekîlimden vekâleten mazmûn-ı kitâba muhâlif da‘vâ sudûr ederse lede’l-hükkâmi’l-kirâm ebkāhümu’llâhü te‘âlâ ilâ-yevmi’l-kıyâm istimâ‘ ve ısgā olunmasın dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis min-şehri Rebî‘i’l-evvel li-sene erba‘a ve sittin ve elf. Şuhûdü’l-hâl: Mehmed b. Ramazan el-mübâşir, İbrahim Çelebi b. Davud, Rıdvan Beşe b. Abdullah, Pîrî Beşe b. Hüseyin ve gayruhum mine’l-huzzâr.