Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 178 Hüküm no: 222 Orijinal metin no: [33b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc İlyas b. Abdullah’ın cariyesini vasiyetle azat ettiği Mahmiye-i İstanbul’da Samanveren Mahallesi’nde sâkin el-Hâc İlyas b. Abdullah tarafından tedbîr-i âti’l-beyânı ikrâra vekîl olup vekâleti Mustafa b. Mehmed el-imâm ve Yusuf Halîfe b. Abdullah el-müezzin şehâdetleri ile şer‘an sâbite olan el-Hâc Osman b. Hasan meclis-i şer‘-i hatîr-i lâzımü’t-tevkīre gelip bi’l-vekâle ikrâr ve takrîr-i kelâm edip müvekkil-i mezbûr, silk-i mülkünde münselike olup rıkkına mu‘terife olan orta boylu, açık kaşlı, gök elâ gözlü, sarışın, Rusiyyetü’l-asl râfi‘atü hâze’l-kitâb Gülistan bt. Abdullah nâm câriyesini hasbeten lillâhi te‘âlâ tedbîr-i mukayyed ile müdebbere eyledi, mevsûfe-i mezbûre müvekkile-i merkūmun vefâtından kırk gün mukaddem sâir harâir-i asliyyât gibi hürre olsun dedikde mâ-hüve’l-vâki‘ gıbbe’t-taleb ketb ü terkīm ve mevsûfe-i mezbûrenin yedine vaz‘ ü teslîm olundu. Tahrîren fi’l-yevmi’t-tâsi‘ min-şehri Rebî‘i’l-evvel li-sene erba‘a ve sittin ve elf. Şuhûdü’l-hâl: el-Hâc Hasan Çelebi el-hammâmî, Çorbacızâde el-Hâc Osman Çelebi, İsmail Çelebi b. Hasan, Mehmed b. Ali, Ahmed b. Mahmud, Sefer Çelebi ve gayruhum.