Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 179 Hüküm no: 223 Orijinal metin no: [33b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Hızır Bey’in vârislerinden Bayezid b. Said’in terekeden hakkını aldığı Mahmiye-i İstanbul’da Elvanzâde Mahallesi’nde sâkin iken bundan akdem vefât eden merhûm Mehmed b. Hızır Bey nâm sagīrin verâseti vâlidesi Fâtıma bt. Mesud nâm hatun ile li-ebin ammi Bayezid b. Said nâm kimesneye münhasıra olduğu şer‘an sâbit ve zâhir oldukdan sonra merkūm Bayezid meclis-i şer‘-i hatîr-i lâzımü’t-tevkīrde sagīr-i mezbûrun muhallefâtına vâzı‘u’l-yed olan merkūme Fâtıma’nın zevci ve tarafeynden husûs-ı âti’z-zikre vekîl-i şer‘îsi olduğu hasm-ı münkir mahzarında nehc-i şer‘î üzere sâbite olan el-Hâc Ramazan b. Mehmed ve sagīr-i mezbûrun hâl-i sıhhatinde tesviye-i umûruna cânib-i şer‘îden mansûb vasîsi olan el-Hâc Ali b. Süleyman mahzarlarında ikrâr-ı tâm ve takrîr-i kelâm edip mûrisimiz sagīr-i mezbûrun muhallefâtından irs-i şer‘le bana isâbet eden on üç bin altı yüz yirmi dokuz akçe hisse-i irsiyemi mezbûr el-Hâc Ramazan yedinden bi’t-tamam ve’l-kemâl ahz u kabz eyledim, zikr olunan on üç bin altı yüz yirmi dokuz akçe hisse-i şer‘iyyemden bir akçe ve bi [bir] habbe kalmayıp sagīr-i mezbûrun kalîl ü kesîr ve celîl ü hakīr ism-i mâl ıtlâk olunur muhallefâtına müte‘allik da‘vâ ve mutâlebâtdan vekîl-i mezbûr el-Hâc Ramazan’ın ve müvekkilesi mezbûre Fâtıma’nın ve vasîsi merkūm el-Hâc Ali’nin zimmetlerini ibrâ-i âmm-ı kātı‘u’n-nizâ‘ ile ibrâ ve ıskāt eyledim, vechen mine’l-vücûh mezbûrân ile da‘vâ ve nizâ‘ım yokdur, ba‘de’l-yevm mazmûn-ı kitâba muhâlif benden bi’z-zât veya bi’l-vâsıta da‘vâ sudûr ederse lede’l-hükkâmi’l-kirâm istimâ‘ olunmaya dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Tahrîren fî- <> evâhiri Saferi’l-hayr li-sene erba‘a ve sittin ve elf. Şuhûdü’l-hâl: el-Hâc Ali Efendi b. Salih Trablusî, el-Hâc Ali b. Cum‘a, el-Hâc Yusuf b. Said, el-Hâc Ahmed b. Said, el-Hâc Ebûbekir b. Bayezid, el-Hâc Ali b. İbrahim, el-Hâc Selim b. Haydar ve gayruhum mine’l-huzzâr.