Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 179 Hüküm no: 224 Orijinal metin no: [34a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe’nin çocukları Hüseyin ve Havva’nın Uyar v. Dimo’nun terekesinden sulh bedeli karşılığı haklarını aldıkları Mahmiye-i İstanbul’da Voynuk Şücâ‘ Mahallesi’nde sâkin iken bundan akdem hâlik olan Uyar v. Dimo’nun verâseti sulbiye kızı Zafire ve sulbiye kebîre kızı Rankoya’ya münhasıra olup ve mezbûre Rankoya dahi hâlike olup verâseti sadrî sagīr oğlu Kostantin’e münhasıra olup ve sagīre-i mezbûre Zafire’nin tesviye-i umûruna Posiva v. Yani nâm zimmî ve sagīr-i mezbûr Kostantin’in tesviye-i umûruna Kalender v. Tarandafilo nâm zimmî cânib-i şer‘den mansûb vasîleri oldukları şer‘an zâhir ve mütebeyyin oldukdan sonra vilâyet-i Rumeli’nde Kalono? kazâsına tâbi‘ Gerendiz? nâm karye ahâlîsinden olup mahmiye-i merkūmede Hızır Subaşı Mahallesi’nde sâkin [iken] fevt olan Mehmed Beşe b. Abdullah’ın sulbî kebîr oğlu Hüseyin nâm şâbb-ı emred mahfil-i kazâda zikrî âtî olan eşyâya vesâyetleri hasebiyle vâzı‘u’l-yed merkūm Posiva ve Rankoya muvâcehesinde ikrâr-ı tâm ve takrîr-i kelâm edip babam merkūm Mehmed Beşe vefât eyledikde mahmiye-i mezbûrda Zeyrek kurbünde vâki‘ Voynuk Şücâ‘ Mahallesi’nde vâki‘ iki tarafdan Mosi v. Avraham nâm Yahûdi mülkü ve tarafeyni tarîk âmm ile mahdûd olan vakıf menzilin içinde mevcûd olan at değirmenin ve anbarının ve üç re’s at ve beynimizde ilm-i şer‘î ile ma‘lûm olan değirmen âlâtının nısf-ı şâyi‘i babam mezbûr Mehmed Beşe’nin mülkü olmağla vefât ettikde sülüsânı bana ve sülüsü kız karındaşım Havvâ’ya irs-i şer‘le intikāl edip lâkin biz sagīr olmağile hâlik-i mezbûr Uyar tegallüben zabt edip ba‘dehû hâlike-i mezbûre Zafire’nin vasiyy-i şer‘îsi mezbûr Posiva ile mezbûre Rankoya tasarruf edip mezbûre Rankoya dahi hâlike oldukda sagīr-i mezbûr Kostantin’in vasîsi merkūm Fablo tasarruf edip hâlâ ben akıl ve bâliğ olmağile eşyâ-i mezbûreden zikr olunan hisse-i şâyi‘amı mezbûrân Posiva ile Fablo’dan da‘vâ ve taleb eylediğimizde mezbûrân dahi baban merkūm Mehmed Beşe’nin düyûn-ı kesîresi olup menkūlâtı vefâ etmeyip ol vakıf menzilin içinde olan eşyânın dahi zarûret-i deyni için ma‘rifet-i hâkim ile bey‘ olunmak lâzım geldikde ba‘de’l-müzâyede ve inkıtâi’r-rağbet mezbûr Uyar üzerinde on yedi bin akçeye karâr etmeğin vasiyy-i şer‘îsi olan Abbas b. Nasuh’dan zikr olunan on yedi bin akçeye iştirâ ve tesellüm ve def‘-i semen edip kırk dört senesi Şevvâli’l-mükerreminin evâsıtında mahmiye-i mezbûrede kassâm-ı askerî olan Nuh Efendi huzûrunda hüccet-i şer‘iyye ibrâz edip lâkin mazmûn-ı hücceti isbâta kādirler olmayıp ben dahi adem-i ilme yemîn etmek sadedinde iken bu husûsda sulh sagīrân-ı mezbûrân haklarında enfa‘dır deyü aramıza muslihûn tavassut edip benim da‘vâ-yı mezkûrumdan fâriğ olmak üzere beş bin yedi yüz akçeye sulh eylediklerinde ben dahi sulh-i mezbûru kabûl ve bedel-i sulh olan meblağ-ı mezbûr beş bin yedi yüz akçeyi merkūmânın yedlerinden ahz u kabz edip husûs-ı mezbûra müte‘allika da‘vâdan sagīrân-ı mezbûrânın zimmetlerini ibrâ-i âmm-ı kātı‘u’n-nizâ‘ ile ibrâ ve ıskāt-ı râfi‘u’l-hısâm ile ıskāt eyledim, min-ba‘d da‘vâ ve nizâ‘ım kalmadı, ba‘de’l-yevm mazmûn-ı kitâba muhâlif bir tarîk ile benden asâleten ve vekâleten da‘vâ sudûr ederse lede’l-hükkâmi’l-kirâm ebkāhümu’llâhü te‘âlâ ilâ-yevmi’l-kıyâm istimâ‘ ve ısgā olunmaya dedikde mâ-vaka‘a ketb ü sebt olundu. Fi’l-yevmi’s-sâbi‘ min-şehri Rebî‘i’l-evvel li-sene erba‘a ve sittin ve elf. Şuhûdü’l-hâl: Derviş b. Selim, Osman Beşe b. Abdullah, Ahmed Beşe b. Hasan, Pîrî Beşe b. Hüseyin, İbrahim Çelebi b. Davud.