Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 180 Hüküm no: 225 Orijinal metin no: [34a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kostantin v. Atnaş’ın borcuna kefil olan Sâliha b. Abdullah’ın parayı Kazgancı Baso’nun vârislerine ödemesi gerektiği Mahmiye-i İstanbul’da Abdi Subaşı Mahallesi’nde sâkin iken bundan akdem hâlik olan Kazgancı Baso’nun bi’l-inhisâr vârisleri olan işbu bâ‘isü’l-kitâb sulbî kebîr oğlu Atnaş asâleten ve sulbî sagīr oğlu Lefter’in tesviye-i umûruna cânib-i şer‘den mansûb vasîsi olan Lefter v. Yani nâm zimmî vesâyeten meclis-i şer‘-i hatîr-i lâzımü’t-tevkīrde Üsküdar kazâsı muzâfâtından Çengel nâm karyede sâkine Sâliha bt. Abdullah nâm hatun mahzarında üzerine herbiri da‘vâ ve takrîr-i kelâm edip mezbûre Sâliha’nın li-ebeveyn karındaşı gāib ani’l-meclis Kostantin v. Atnaş nâm Nasrânî zimmetinde hâlik-i mezbûrun cihet-i karz-ı şer‘îden yüz kıt‘a riyâlî guruş hakkı olup meblağ-ı mezbûrun cem‘îsine mezbûre Sâliha emr [ve] kabûlü hâviye kefâlet ile kefîl bi’l-mâl olmuş idi. Hâlâ meblağ-ı mezbûru kefâleti hasebiyle mezbûre Sâliha’dan taleb ederim, suâl olunsun dediklerinde gıbbe’s-suâl mezbûre Sâliha cevâbında fi’l-vâki‘ meblağ-ı mezbûra ben kefîl olup kefâletim hasebiyle müdde‘iyân-ı mezbûrâna el-ân zimmetimde edâsı lâzım deynimdir deyü bi-tav‘ihâ ikrâr u i‘tirâf etmeğin mûcebince mezbûre Sâliha meblağ-ı mezbûru edâ etmek üzere ilzâm olunup mâ-vaka‘a bi’t-taleb ketb olundu. Tahrîren fi’l-yevmi’r-râbi‘ aşer min-Rebî‘i’l-evvel li-sene erba‘a ve sittin ve elf. Şuhûdü’l-hâl: İbrahim b. Davud, Pîrî b. Hüseyin, Ramazan b. Yusuf, el-Hâc Mehmed, Muharrem Beşe.