Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 181 Hüküm no: 226 Orijinal metin no: [34b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abraham v. Yasef’in Süleyman Beşe b. Ahmed’e mudârebeden olan borcunu taksitle ödeyeceği Zümre-i râcilînden Süleyman Beşe b. Ahmed meclis-i şer‘-i hatîr-i lâzımü’t-tevkīrde mahmiye-i İstanbul’da Uçman? cemâ‘atinden işbu bâ‘isü’r-rakīm Abraham v. Yasef muvâcehesinde ikrâr-ı tâm ve takrîr-i kelâm edip mezbûr Abraham mukaddemâ mudârebe tarîki ile kırk iki bin beş yüz akçe almak üzere mâlımdan beş yüz kırk riyâlî guruş verip ol dahi meblağ-ı mezbûru vech-i muharrer üzere yedimden bi’t-tamam alıp kabz edip meblağ-ı mezbûr ile ticâret edip re’s-i mâlımdan ziyâde ne mikdâr ribh hâsıl olursa nısfı amelim mukābelesinde mezbûr Abraham’ın ve nısf-ı âharı benim olmak üzere şart eylemişdik, mezbûr Abraham meblağ-ı mezbûr ile ticâret edip kendi kavli üzere hâsıl olan on altı bin akçe fâideden bana sekiz bin akçe verip ben dahi alıp ba‘dehû mudârebeyi feshedip re’s-i malımı taleb eylediğimde mezbûr Abraham re’s-i mâlımdan bana altı bin akçe verip ben dahi meblağ-ı mezbûr altı bin akçemi alıp kabz edip otuz altı bin beş yüz akçem yedinde kalmışdı, hâlâ meblağ-ı bâkī otuz altı bin beş yüz akçemi def‘aten bana edâya iktidârı olmayıp taksîte râgıb olmağla ben dahi her otuz gün tamamında bana üç bin akçe vermek üzere târîh-i kitâbdan üç yüz altmış beş gün tamamına değin taksît eyledim, mezbûr Abraham dahi taksît-i mezbûru kabûl ve meblağ-ı bâkī otuz altı bin beş yüz akçeyi minvâl-i muharrer üzere edâya müte‘ahhid oldu dedikde gıbbe’t-tasdîkı’l-mu‘teber Sinob cemâ‘atinden Bayram v. Behi ve Menteş v. Behi nâm Yahûdiler meclis-i mesfûr[da] hâzırân olup mezbûr Hüseyin Beşe’nin merkūm Abraham yedinde bâkī kalan meblağ-ı mezbûr otuz altı bin beş yüz akçenin cemî‘sine emr ve kabûlü hâviye kefâlet-i sahîh-i şer‘iyye ile herbirimiz kefîl bi’l-mâl olduk dediklerinde mâ-vaka‘a gıbbe’t-taleb ketb ü sebt olundu. Tahrîren fi’l-yevmi’l-hâmis min-şehri Rebî‘i’l-evvel li-sene erba‘a ve sittin ve elf. Şuhûdü’l-hâl: İbrahim Çelebi b. Davud, Pîrî Beşe b. Hüseyin, Ramazan b. Yusuf, Rıdvan Beşe [b.] Abdullah, Mehmed b. Abdullah, Üveys b. Ali.