Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 182 Hüküm no: 227 Orijinal metin no: [34b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dayanos v. Kiryazi’nin el-Hâc Ferhad’a olan borcuna kefil olan Yamandi v. Dimitri’nin borcu ödemesi Mahmiye-i İstanbul’da Mi‘mâr Ayas Mahallesi’nde sâkin işbu bâ‘isü’l-kitâb el-Hâc Ferhad b. Abdullah nâm yesârî mahmiye-i Galata’da Sultan Bayezid-i cedîd Mahallesi’nde sâkin Yamandi v. Dimitri nâm zimmîyi meclis-i şer‘-i hatîr-i lâzımü’t-tevkīre ihzâr ve üzerine da‘vâ edip hâlâ vilâyet-i Rumeli’nde kasaba-i Tırnova ve tevâbi‘i metrepolidi olan Dayanos v. Kiryazi nâm râhib zimmetinde cihet-i karz-ı şer‘îden sekiz yüz on iki buçuk kıt‘a riyâlî guruş hakkım olup meblağ-ı mezbûrun cem‘îsine merkūm Yamandi emr ve kabûlü hâviye kefâlet-i sahîh-i şer‘iyye ile kefîl olup bin elli altı senesi Zilhicesi’nin üçüncü günü yine mahmiye-i İstanbul’da Ahi Çelebi mahkemesine nâibü’ş-şer‘ olan Ya‘kub Efendi huzûrunda hüccet-i şer‘iyye olunmuş idi. Hâlâ zikr olunan sekiz yüz on iki buçuk guruş hakkımı mezbûr Yamandi’den kefâleti hasebiyle taleb ederim deyip mazmûnu takrîrine muvâfık târîh-i merkūm ile müverraha mûmâ-ileyh Ya‘kub Efendi’nin imzâ ve hatemini müştemil hüccet-i şer‘iyye ibrâz etmeğin hüccet-i merkūme mezkûr Yamandi muvâcehesinde kırâet olundukdan sonra istintak olundukda mezkûr Yamandi fi’l-vâki‘ müdde‘î-i mezbûr el-Hâc Ferhad’ın cihet-i mezkûreden râhib-i merkūm Dayanos zimmetinde olan meblağ-ı mezkûr sekiz yüz on iki buçuk riyâlî guruş hakkının cem‘îsine târîh-i merkūmda minvâl-i muharrer üzere ben kefîl bi’l-mâl oldum deyü mazmûn-ı hücceti ikrâr ile cevâb verip lâkin müdde‘î-i mezbûrun meblağ-ı merkūmu râhib-i mezbûrdan bi’t-tamam kabz etmekle meblağ-ı mezbûrdan benim zimmetim berî oldu deyü def‘ ile mukābele edicek mezbûr el-Hâc Ferhad meblağ-ı mezbûru asîl-i merkūmdan almadım deyü inkâr etmeğin mezbûr Yamandi’den def‘-i mezbûrun minvâl-i muharrer üzere vukū‘unu mübeyyine beyyine taleb olundukda ikāmet-i beyyineden ızhâr-ı acz ile istihlâf etmeğin mezbûr el-Hâc Ferhad meblağ-ı mezbûru asîl-i merkūm Dayanos’dan küllen ve ba‘zan ahz u kabz edip bir tarîk ile zimmetini ibrâ etmediğine yemîn teklîf olundukda ol dahi hasebi’l-mesûl yemîn bi’llâhi te‘âlâ etmeğin mûcebince meblağ-ı mezbûru müdde‘î-i merkūma kefâleti hasebiyle edâ etmek üzere merkūm Yamandi’ye tenbîh olunup mâ-vaka‘a gıbbe’t-taleb ketb ü sebt olundu. Fi’l-yevmi’s-sâbi‘ aşer min-şehri Rebî‘ülevvel sene 1064. Şuhûdü’l-hâl: Ali Beşe b. Mehmed, Mehmed Beşe b. Ahmed, Mehmed Çelebi b. İskender, Mehmed Beşe b. Hüseyin, Ahmed Beşe b. Mehmed, Ali Beşe b. Mehmed.