Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 183 Hüküm no: 228 Orijinal metin no: [34b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Borçlu olarak vefât eden Yusuf Beşe’nin dükkânında bulunan malzemelerin borçlu olduğu Hüseyin b. Mustafa’ya satılarak kalan paranın vasisine verildiği Mahrûse-i Galata’da Müeyyedzâde Mahallesi’nde sâkin iken bundan akdem müteveffâ olan Yusuf Beşe b. Abdullah’ın düyûn-ı kesîresi olmağla metrûkâtını bey‘ ve guremâsına edâ ve îfâya vasiyy-i muhtâr nasb ve ihtiyâr eylediği Ahmed Çavuş b. Veli mahfil-i şer‘-i şerîfde işbu sâhibü’l-kitâb Hüseyin b. Mustafa nâm kimesne mahzarında bi’l-vesâye ikrâr-ı tâm ve takrîr-i kelâm edip müteveffâ-i mezbûrun mahmiye-i İstanbul’da Çiniciler sûkunda vâki‘ dükkânı dâhilinde olan mikdârı ma‘lûm taş ve tekneyi bi-safkatin vâhidetin mezbûr Hüseyin’e otuz üç bin yedi yüz altmış akçeye bey‘ ve teslîm ol dahi iştirâ ve tesellüm eyledikden sonra semen-i mezbûrdan altı bin üç yüz akçesini mezbûr Hüseyin’in müteveffâ-i mezbûr zimmetinde olan altı bin üç yüz akçe hakkına takās olunup bâkī yirmi yedi bin dört yüz altmış akçeyi mezbûr Hüseyin yedinden bi’t-tamam ahz ve istîfâ edip zimmetinde bir akçe ve bir habbe bâkī kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâdis aşer min-şehri Rebî‘i’l-evvel li-sene erba‘a ve sittin ve elf. Şuhûdü’l-hâl: İbrahim Beşe b. Ramazan, Sefer Beşe b. Ali, Resül b. Ali, el-Hâc Şa‘ban Beşe, Hüseyin b. Ali ve gayruhum mine’l-huzzâr.