Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 183 Hüküm no: 229 Orijinal metin no: [35a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha bt. Abdullah’ın evini Mehmed Beşe ile Râbia Hatun’a sattığı Üsküdar kazâsına tâbi‘ Çengel nâm karyede sâkine Sâliha bt. Abdullah nâm hatun meclis-i şer‘de bâ‘iseyi’l-kitâb kızı Havvâ’nın kızı Râbia bt. Abdullah nâm hatun ve mezbûre Râbia’nın zevci Mehmed Beşe b. Abdullah mahzarında ikrâr-ı tâm ve takrîr-i kelâm edip karye-i mezbûrede vâki‘ bir tarafı Şa‘ban Beşe mülkü ve bir tarafdan Celiyani mülkü ve bir tarafı dere ve bir tarafı tarîk-i âm ile mahdûd iki bâb fevkānî odaları ve iki tahta-pûş ve altında mahzeni ve bir reyb asma ağacını ve bi’r-i mâyı müştemil olan mülk menzilimi cümle tevâbi‘ ve levâhıkı ve kâffe-i menâfi‘ ve merâfıkı ile mezbûrân Mehmed Beşe ve Râbia’ya on iki bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip onlar dahi ale’l-iştirâki’s-seviyy iştirâ ve tesellüm eylediklerinden sonra semen-i mezbûr on iki bin akçeyi yedlerinden tamamen ahz u kabz eyledim, ba‘de’l-yevm menzil-i mezbûrda benim alâka ve medhalim kalmadı mezbûrânın mülk-i müşterâları olmuşdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin aşer min-şehri Rebî‘i’l-evvel li-sene erba‘a ve sittin ve elf. Şuhûdü’l-hâl: Fazlullah Efendi b. Receb el-imâm, el-Hâc Yusuf b. Ahmed, Mehmed b. Süleyman, Hüseyin Beşe b. Hasan, Seydî Beşe b. Abdullah, Mehmed Beşe b. Abdüllatif, Ali Beşe b. Abdullah, Mustafa b. Hüseyin, Mehmed Beşe b. Ali, Mehmed Beşe b. Hüseyin ve gayruhum.