Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 184 Hüküm no: 230 Orijinal metin no: [35a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman Çelebi’nin evini sattığı Vilâyet-i Anadolu’da Yoros kazâsına tâbi‘ kasaba-i Kavak sükkânından Süleyman Çelebi b. Musa nâm râcil mahfil-i şer‘-i şerîfde işbu sâhibü’l-kitâb umdetü erbâbi’t-tahrîr ve’l-kalem Hasan Efendi b. Hüseyin tarafından tasdîk-i âti’z-zikre vekîl olup İsmail Ağa b. İbrahim ve Hüseyin b. Mehmed nâm kimesneler şehâdetleriyle vekâleti sâbite olan Mehmed Çelebi b. Abdullah muvâcehesinde bi’t-tav‘i’s-sâf ikrâr u i‘tirâf edip kasaba-i mezbûrede vâki‘ bir tarafdan merhûm Yahya Efendi Vakfı’na ve bir tarafdan yine âhar mülküne ve iki tarafdan tarîk-i âmma müntehî olup fevkānî ve tahtânî üç bâb beyti ve eşcâr-ı müsmire ve gayrı müsmireyi hâvî cüneyneyi ve bir mikdâr bağı ve arsa-yı hâliyeyi müştemil olan mülk menzilimi bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık müvekkil-i mezbûra bey‘-i bâtt-ı sahîh-i şer‘î ile yirmi beş bin beş yüz akçeye bey‘ ve teslîm ol dahi vech-i muharrer üzere iştirâ ve tesellüm ve kabz eyleyip semen-i mersûm yirmi beş bin beş yüz akçeyi yedinden bi’t-tamam ahz u kabz eyledim, ba‘de’l-yevm menzil-i mezbûrda aslâ medhal ve alâkam kalmadı, mezbûr Hasan Efendi’nin mülk-i mahzı ve hakk-ı sırfı olmuşdur, keyfe mâ yeşâ’ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-evâsıtı Saferi’l-hayr li-sene erba‘a ve sittin ve elf. Şuhûdü’l-hâl: Mehmed Efendi b. ( ) kâtib-i hazret-i Murad Paşa, Ramazan Ağa b. Mehmed ser-mehterân, Ramazan Ağa b. ( ) ser-şâtırân, Ali Çelebi b. Mehmed el-cündî.