Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 184 Hüküm no: 231 Orijinal metin no: [35a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden kazancıbaşı el-Hâc Ahmed Ağa’ya bakır hesabından borcu olan Hançer v. Tekfur’un borcunu vârislere ödemesi Mahmiye-i İstanbul’da Hoca Hayreddin Mahallesi’nde sâkin iken bundan akdem vefât eden kazgancıbaşı merhûm el-Hâc Ahmed Ağa’nın sulbî oğulları Abdullah ve Mehmed ve Ali nâm sagīrlerin tesviye-i umûrlarına kıbel-i şer‘den mansûb vasîleri olan işbu bâ‘isü’l-kitâb Mehmed b. Ali nâm kimesne meclis-i şer‘-i hatîr-i lâzımü’t-tevkīrde kazgancı tâifesinden Hançer v. Tekfur nâm zimmî muvâcehesinde bi’l-vesâye üzerine da‘vâ ve takrîr-i kelâm edip müteveffâ-i mezbûr el-Hâc Ahmed’e hâl-i sıhhatinde aşûre kazganı demekle ma‘rûf kazganı tevsî‘ için her vakıyyesi ellişer akçe kıymetli sekiz yüz vakıyye bakırı gāib ani’l-meclis Avanos nâm Ermeni ile merkūm Hançer’e verip merkūmân dahi teslîm ve ol kazganı tevsî‘ ettiklerinde cânib-i mîrîden vezn olundukda yüz yirmi vakıyye bakır noksan gelmeğin hesâb-ı mezkûr üzere altı bin akçe kıymeti mezbûrândan taraf-ı mîrîden taleb ettiklerinde mezbûrân Hançer ve Avanos meblağ-ı mezbûru sen mâlından edâ edip bizi mutâlebeden halâs eyle, ba‘dehû biz sana edâ edelim deyü emr ettiklerinde ebnâ-yı mezbûr el-Hâc Ahmed meblağ-ı mezbûru merkūmânın emirleri ile cânib-i mîrîye edâ edip ba‘dehû meblağ-ı mezbûru merkūmândan taleb eyledikde üç bin akçesini mersûm Avanos hâl-i sıhhatinde kendüye edâ edip üç bin akçesini dahi merkūm Hançer zimmetinde lâzımü’l-edâ deyni olduğu alâ-ruûsi’l-işhâd ikrâr u i‘tirâf ettikden sonra kable’l-istîfâ merkūm el-Hâc Ahmed fevt olup ol meblağı sıgār-ı mezbûrîne intikāl <> etmekle vesâyetim hasebiyle taleb ederim, suâl olunsun dedikde gıbbe’s-suâl ve akībe’l-inkâr vasiyy-i mezbûr Mehmed’den da‘vâsına mutâbıka beyyine taleb olundukda udûl-i ricâlden olup tâife-i mezbûrenin kethüdâları olan el-Hâc İbrahim b. Musa tâife-i merkūmenin odabaşısı Şa‘ban b. Mehmed nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka merkūm Hançer zikr olunan yüz yirmi vakıyye bakırın hesâb-ı mezkûr üzere kıymeti olup benim ve mezbûr Avanes’in emrimiz ile cânib-i mîrîye edâ eylediği altı bin akçeden el-ân zimmetimde üç bin akçe müteveffâ-i mezbûra hâl-i sıhhatinde deynimiz vardır deyü bizim huzûrumuzda mezbûr Hançer bi’s-sâf ikrâr u i‘tirâf eyledi, bu husûsa biz bu vech üzere şâhidleriz şehâdet dahi ederiz deyü herbiri edâ-yı şehâdet-i şer‘iyye ettiklerinde ba‘de’t-ta‘dîl ve’t-tezkiye şehâdetleri makbûle olmağın mûcebince meblağ-ı mezbûr üç bin akçesi vasiyy-i mezbûra edâ etmek üzere merkūm Hançer’e tenbîh-birle mâ-vaka‘a bi’t-taleb ketb olundu. Şuhûdü’l-hâl: Hüseyin b. Mustafa hüddâm-ı mahkeme, Hüseyin b. Mehmed, Halil Beşe b. Derviş.