Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 185 Hüküm no: 232 Orijinal metin no: [35b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Ali Bey’in kölesini hayatta iken âzat etmiş olduğu Sabıkā hâssa bostâncılar odabaşısı olup bundan akdem vefât eden merhûm Ali Bey b. Mustafa’nın zâhirde vâris-i ma‘rûfu olmamağla muhallefâtını cânib-i mîrîden ahz u kabza murahhas ve memûr olup bi’l-fi‘il bostâncıbaşı olan iftihârü’l-emâcid ve’l-ekârim câmi‘ü’l-mehâmid ve’l-mekârim zi’l-kadri’r-refî‘ ve’l-câhi’l-menî‘ Ahmed Ağa -zîde kadruhu- taraf-ı şerîflerinden husûs-ı âti’l-beyânı ikrâra vekîl olup vekâleti hasm-ı câhid-i şer‘î mahzarında Nuh Efendi b. Receb ve İbrahim Bey b. Durak şehâdetleri ile şer‘an sâbite olan Mehmed Bey b. Abdullah mahfil-i kazâda sarışın, gök gözlü, açık kaşlı, sol gözünün alt kapağında eser-i cerâhati olan Rusiyyü’l-asl râfi‘u hâze’l-kitâb Yusuf b. Abdullah mahzarında bi’l-vekâle ikrâr-ı tâm ve takrîr-i kelâm edip mevsûf-ı mezbûr müteveffâ-i merkūmun abd-i memlûkü olmağile hâl-i hayâtında ve kemâl-i sıhhatinde mâlından âzâd edip mezbûr Yusuf sâir ahrâr-ı asliyyîn gibi hür olup üzerinde müvekkil-i müşârun-ileyhin ve sâir efrâd-ı âferîdeden bir ferdin alâka ve medhali yokdur dedikde gıbbe’t-tasdîkı’ş-şer‘î ketb ü sebt olundu. Fi’l-yevmi’l-ışrîn min-şehri Rebî‘i’l-evvel li-sene erba‘a ve sittin ve elf. Şuhûdü’l-hâl: Şükrullah b. Mahmud Efendi, Tokatlı Ali Ağa, Hekim Mustafa Ali, Hekimbaşızâde Mehmed Çelebi b. Hüseyin, Abdullah Hoca ve gayruhum.