Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 187 Hüküm no: 235 Orijinal metin no: [35b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Ali Bey’in hayatta iken kölesini âzat etmiş olduğu Sabıkā hâssa bostancılar odabaşısı olup bundan akdem vefât eden merhûm Ali Bey b. Mustafa’nın zâhirde vâris-i ma‘rûfu olmamağla muhallefâtını cânib-i mîrîden ahz u kabza murahhas ve memûr olup bi’l-fi‘il bostâncıbaşı olan iftihârü’l-emâcid ve’l-ekârim câmi‘ü’l-mehâmid ve’l-mekârim zi’l-kadri’r-refî‘ ve’l-câhi’l-menî‘ Ahmed Ağa -zîde kadruhu- taraf-ı şerîflerinden husûs-ı âti’l-beyânı ikrâra vekîli olup vekâleti hasm-ı câhid-i şer‘î mahzarında Nuh Efendi b. Receb ve İbrahim Bey b. Durak şehâdetleri ile şer‘an sâbite olan Mehmed Bey b. Abdullah mahfil-i kazâda uzun boylu, çatık kaşlı, kara gözlü, kara yağız, Gürciyyü’l-asl râfi‘u hâze’l-kitâb Siyavuş b. Abdullah mahzarında bi’l-vekâle ikrâr-ı tâm ve takrîr-i kelâm edip mevsûf-ı mezbûr müteveffâ-i merkūmun abd-i memlûkü olmağla hâl-i hayâtında ve kemâl-i sıhhatinde mâlından âzâd edip mezbûr Siyavuş sâir ahrâr-ı asliyyîn gibi hür olmağın üzerinde müvekkil-i müşârun-ileyhin ve sâir efrâd-ı âferîdeden bir ferdin alâka ve medhali yokdur dedikde gıbbe’t-tasdîkı’ş-şer‘î mâ-vaka‘a ketb ve terkīm ve mevsûf-ı mezbûrun yedine def‘ ü teslîm olundu. Fi’t-târîhi’l-mezbûr. Şuhûdü’s-sâbıkūn.